Ma’lum qilinishicha, 7-yanvar kuni soat 15:00 larda Yunusobod tumani Yangi shahar ko‘chasi bo‘ylab kuchli darajadagi mast bo‘lgan, fuqaro A.A. (1976-yilda tug‘ilgan) Malibu avtotransportida shu yerda xizmat o‘tayotgan YHX xodimlarining qonuniy talablariga bo‘ysunmasdan, o‘zgalarning hayoti va sog‘lig‘iga xavf solgan holda qochishga uringan.
Xodimlar haydovchining noqonuniy harakatlari natijasida yuzaga kelishi mumkin bo‘lgan og‘ir oqibatlarning oldini olish maqsadida belgilangan tartibda o‘qotar qurol qo‘llagan.
Natijada avtotransport vositasi majburiy to‘xtatilib, haydovchi zararsizlantirilgan. Qurol qo‘llanilishi natijasida hech kim jarohatlanmagan.
Hozirda mazkur holat yuzasidan Yunusobod tumani prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilib, tergov harakatlari olib borilmoqda.
Eslatib o‘tamiz, 2019-yilda ham Toshkentda YPX inspektori mast haydovchini ushlash uchun unga qarata o‘q uzishga majbur bo‘lgandi. 2021-yilning yanvarida esa Qatortolda kaltak yegan PPX xodimi fuqaroga qarshi o‘qotar qurol ishlatmoqchi bo‘lgan, uni mushtlashuvni boshlagan YPX xodimi to‘xtatib qolgan edi.
Izoh (0)