iPhone 13 va iPhone 12 orasidagi farq yangi kadrlar orqali namoyish etildi

Apple kompaniyasi sentabrning uchinchi haftasida yangi iPhone’lar seriyasini taqdim etadi. Hi-Tech.Mail.ru yangi qurilmaning tashqi ko‘rinishi qanday o‘zgarishga uchrashi tasvirlangan suratlar bilan bo‘lishdi.

Barcha o‘lchamlar Innocent Store tomonidan iPhone 13 mini, iPhone 13, iPhone 13 Pro va iPhone 13 Pro Max uchun chiqarilgan aksessuarlarga asoslangan. G‘iloflarga qarab, masalan, iPhone’ning kamera o‘lchamlari va korpusidagi boshqa yangiliklardan xabar topish mumkin.

Xususan, e’lon qilingan suratlarda ko‘rish mumkinki, kamera joylashgan blok ikki millimetrga kattalashadi. Masalan, iPhone 12 da uning diametri 3,71 santimetrni tashkil etgan bo‘lsa, iPhone 13 da 3,98 santimetrga yetadi. iPhone 12 Pro, 12 Pro Max’lar yagona o‘lchamli — 4,49 santimetrli kameraga ega bo‘ladi.

Tabiiyki, Apple alohida linzalari o‘lchamini ham o‘zgartiradi. Bu kabi o‘zgarishga takomillashgan kamera, Sensor Shift barqarorlashtiruvchi texnologiyasi sabab qilib ko‘rsatilmoqda. Bundan oldin mazkur texnologiya faqatgina iPhone 12 Pro Max modellarida qo‘llangan, endilikda esa iPhone 13 lineykasidagi barcha modellar ega bo‘ladi.

Silikondan ishlangan himoya g‘ilofi Apple ovozni boshqarish va bloklash tugmasining joyi o‘zgarganini ko‘rsatadi. Ular 6,2 millimetr pastroqqa siljigan. Bu barmoqlari kaltaroq foydalanuvchilar ham undan osonlikcha foydalanishini ta’minlaydi.

Mish-mishlarga ko‘ra, Kupertinoda yaratiladigan yangi flagmanlar 0,2 millimetrga qalinroq bo‘ladi.

iPhone 13 seriyasidagi modellar dizaynidagi asosiy o‘zgarishlardan biri — old qismidagi qirqimning kichraygani. Masalan, iPhone 12 da uning o‘lchami 3,45 santimetrni tashkil etgan bo‘lsa, yangi avlodda 2,57 santimetr bo‘ladi.

Avvalroq internetda iPhone 13 Pro’ning quvvatlantirish “razyom”isiz tasvirlangan suratlari tarqalgan, Apple kompaniyasi iPhone 13 modellari taqchil bo‘lishidan ogohlantirgan edi.