“Daryo”ni Telegram’da o‘qing! Join!
08:59, 11.08.2021 10898

Elektromobillar 19 yildan so‘ng jahon bozorining uchdan ikki qismini egallaydi — ekspertlar

Bloomberg ekspertlarining hisoblashicha, elektrokarlar bozorida keyingi 19 yil davomida keskin o‘sish kuzatiladi. Ularning prognozlariga ko‘ra, 2040-yilga borib ular ichki yonuv dvigateliga ega avtomobillarni siqib chiqarib, jahon avtomobil bozorining kamida uchdan ikki qismini egallaydi. Raqamlarda ifodalanadigan bo‘lsa, “yashil” avtomobillar savdosi yiliga 66 million donaga yetadi, deb xabar beradi Motor.

Foto: Depositphotos

Ekspertlarning fikricha, elektrokarlar va gibridlar hozirga kelib ichki yonuv dvigateliga ega avtomobillarga raqobat ko‘rsatmoqda va borgan sari ularning ustunligi ortib boradi. Xususan, 2030-yildan boshlab benzin-elektr energiyasida harakatlanuvchi mashinalar ham qisqarib, “toza” elektrokar va yoqilg‘i elementlaridagi avtomobillarga o‘z o‘rnini bo‘shatib beradi.

Prognozlarga ko‘ra, dunyoda elektrokarlar savdosi bo‘yicha Xitoy yetakchiga aylanadi — sotuvga chiqariladigan barcha mashinalarning uchdan bir qismi ushbu mamlakat hisobiga to‘g‘ri keladi. Ikkinchi o‘rindan hozirdan boshlab radikal o‘zgarishlarga tayyorgarlik ko‘rayotgan Yevropa davlatlari o‘rin oladi: 2035-yildan boshlab Yevropa Ittifoqining 27 ta mamlakatida yoqilg‘ili mashinalar, jumladan, gibridlardan foydalanish taqiqlanadi. Uchinchi o‘rinni esa AQSh egallaydi.

Bunga elektromobillarning yanada rivojlanishi sabab qilib ko‘rsatilmoqda: bir marta quvvatlanish orqali uzoq masofa bosib o‘tishi, akkumulyatorlar narxining arzonlashuvi, quvvatlantirish stansiyalari sonining ortishi, shuningdek, hukumatlar tomonidan turli subsidiya va imtiyozlarning taqdim etilishi.

Zamonaviy elektrokarlarda foydalanilayotgan litiy-ionli batareyalarni ishlab chiqarish borasidagi yetakchilik Xitoyga tegishli va unga yetib olish oson bo‘lmaydi. Har yili mamlakatda umumiy sig‘imi 479 gigavatt-soatga teng akkumulyatorlar tayyorlanadi va ishlab chiqarish maydonchalari tobora ortmoqda. Taqqoslash uchun, Yevropada ushbu ko‘rsatkich 39 gigavatt-soatni tashkil etadi, 2025-yilga borib ushbu mamlakatlar hukumatlarining rejasiga ko‘ra, 400 gigavatt-soatga yetishi kerak.

Avvalroq O‘zbekistondagi bir nechta kompaniyalar 2021—2023-yillarda avtomobillar, pikaplar, yuk mashinalari, mikroavtobuslar va boshqa avtomobillarni ishlab chiqarish va yig‘ishni yo‘lga qo‘ymoqchi ekanligi haqida xabar berilgan edi. Prezident yiliga 50-60 ming dona hamyonbop avtomobillar va elektromobillar ishlab chiqarishni yo‘lga qo‘yib, avtomobil sanoati uchun sarmoya kiritish zarurligini ta’kidlagan edi.

Boshqa yangiliklar