Yakkabog‘ tumani hokimi Lutfiddin Abdullayev matbuot kotibi Sherzod Hasanovning bloger Elmurod Odilov telefonini tortib olib, fleshkasidagi videolarni o‘chirib tashlaganini salbiy baholashini bildirdi. Bu haqda hokim ishtirokidagi matbuot anjumanida ma’lum qilindi, deya xabar berdi “Daryo” muxbiri.
Qayd etilishicha, Yakkabog‘ hokimi Lutfiddin Abdullayev so‘nggi paytlarda tumanda yuz berayotgan shov-shuvli voqealar — bloger ustidan IIBga shikoyat qilinishi, hokimlik matbuot kotibi tomonidan blogerning telefoni tortib olinib, videolari o‘chirilishi kabi masalalarni izohlash maqsadida OAV vakillari uchun press-tur tashkil qilgan.
Press-tur davomida tashkil etilgan matbuot anjumanida so‘z olgan hokim Lutfiddin Abdullayev jurnalist va blogerlar savoliga javoban, matbuot kotibi Sherzod Hasanovning bloger telefonini tortib olganini va telefondagi videolarni o‘chirib yuborganini izohlar ekan, matbuot kotibining bu harakatini salbiy baholaganini, buning uchun unga tanbeh berganini bildirdi.
“Avvalo har ikkalasidan ham ayb o‘tgan. Ikkalasi ham yosh bo‘lishiga qaramasdan, bir-biriga yomon munosabatda bo‘lib, shov-shuvga sabab bo‘lgan. Matbuot kotibimning ishini ijobiy baholamayman va bu haqda o‘ziga aytib, tushuntirganman. Ikkalasi ham yosh yigitlar kelishib, masalani oxirigacha yetib, yoritishsa bo‘lardi. Bloger xolis yoritmayapti degan gapga keladigan bo‘lsak, bunga o‘zim ham guvoh bo‘lyapman. Ko‘tarilgan muammoni shaxsan o‘zim borib o‘rganib ko‘rganimda, haqiqiy holat boshqacha bo‘lib chiqyapti. Ammo o‘sha holatni biz ijtimoiy tarmoqlarga olib chiqib, fuqaroni uyaltirmayapmiz. Boisi, uning farzandlari, yaqinlari bor. Biz bu ma’lumotlarni chiqarsak, u kishiga nisbatan salbiy munosabatlar uyg‘onib, ma’naviy zarar yetkazib qo‘yishimiz mumkin. Shuning uchun bloger ham muammoni avval obdon o‘rganib, ikkinchi tomon fikrini ham eshitib, keyin yoritsa maqsadga muvofiq bo‘lardi”, — dedi Lutfiddin Abdullayev.
Yakkabog‘ hokimi, shuningdek, tumanda faoliyat yurituvchi blogerlar 60 sotix suvli yer maydoni bor, uyining fundamenti uncha-muncha odamning uyi fundamentidan zo‘r uy egasini qiynalgan, muammo girdobida qolgan fuqaro sifatida olib chiqayotganini aytib, ‘Uyida 60 sotix suvli yeri bo‘lsa-yu, ishlamasa. Bu insofdan emas-ku’, degan.
Eslatib o‘tamiz, avvalroq tuman hokimi matbuot kotibi Sherzod Hasanov va bloger Elmurod Odilov o‘rtasida muammo kelib chiqqandi. Hokimlik vakili fuqarolar murojaatini o‘rganib, videotasvirga olgan blogerning yoniga borib, uni xolis yoritmaslikda ayblagani, blogerning telefonini tortib olgani, shuningdek, bloger ustidan tuman IIBga shikoyat qilinib, Elmurod Odilov konstitutsion tuzumga tajovuzda ayblanayotgani xabar berilgandi.
Izoh (0)