“Pullarni ishlab topmaganmiz, shu sababli hech narsa qila olmadik”. AQShda hisob raqamiga tasodifan 50 mlrd dollar o‘tkazib yuborilgan oila pullarni bankka qaytardi

12-iyun kuni Luiziana shtatida istiqomat qiluvchi Darren Jeyms ismli erkak rafiqasining bank hisob raqamida xatolik sabab 50 milliard dollar paydo bo‘lib qolganidan xabar topgan. Bank hisobdagi pullarni to‘rt kun davomida yechib olgan, biroq bu vaqt ichida oila tasodifan o‘tkazilgan pullarning bir sentiga ham tegmagan, deb xabar beradi Esquire.

Avvaliga 47 yoshli amerikalik pullarni noma’lum uzoq qarindoshlaridan biri meros sifatida qoldirganiga umid qilgan, ammo keyinroq oila pullar xatolik sabab o‘tkazilganini tushunib, bank vakillari bilan bog‘langan. “Bu pullar bizniki emasligini bilar edik. Bu pullarni ishlab topmaganmiz, shu sabab uni biror narsa qila olmasdik”, — deydi Jeyms. Bundan tashqari, erkak oldin jamoat xavfsizligi bo‘yicha mahalliy departamentda ishlagan va bu kabi pullarni ishlatish o‘g‘irlik hisoblanishini bilgan.

Bank oilaning hisobidagi 50 milliard dollarni 15-iyun kuni yechib bo‘lgan va bu vaqt ichida Jeyms hamda uning rafiqasi dunyoning eng badavlat oilalaridan biri hisoblangan. “Akkauntimizda nollar ko‘pligini ko‘rganimda ajoyib hissiyotlar qamrab oldi. Buni tomosha qilish yoqimli edi”, — deydi Jeyms.

Biroq TikTok’dagi @Thatcroclady niki ostidagi foydalanuvchining omadi kelmagan. 20-iyun kuni u bankdan 50 milliard dollar qarzdorligidan xabar topgan. Ertasi kuni esa bank muammoni hal etgan va qarzni o‘chirib tashlagan.