Toshkentning Yunusobod tumanida katta tezlikda harakatlangan Lacetti beton simyog‘ochga urildi. Bu haqda YHXBB matbuot xizmati xabar berdi.
Dastlabki ma’lumotlarga ko‘ra, 30-iyun kuni Lacetti’ni katta tezlikda boshqararib ketayotgan haydovchi Yunusobod tumanidagi “Turkiston” kafesi qarshisida tartibga solinmagan piyodalar o‘tish yo‘lagidan o‘tayotgan piyodalarni urib yubormaslik uchun rulni chap tomonga burgan.
Keskin burilish oqibatida avtomobil avval piyodalar belgisiga va beton simyog‘ochga borib urilgan. Beton simyog‘ochning parchalari yo‘lning narigi tomonidan harakatlanib kelayotgan Spark avtomobiliga teggan.
Mazkur YTH yuzasidan Toshkent shahar IIBB YHXB tomonidan surishtiruv harakatlari olib borilmoqda.
Avvalroq Qashqadaryoda ikki piyodani urib yubormaslik uchun rulni o‘ngga burgan Nexia chuqurga ag‘anagani, uning ortidan kelayotgan mashina esa ularni urib yuborgani haqida xabar berilgan edi.
