Aktyor va rejissor Furqat Fayziyev 10 yildan buyon Qozog‘iston Respublikasida yashamoqda.
Foto: “Daryo”
Furqat Fayziyev “Daryo” muxbiri Feruz Muhammadga bergan intervyusida nima sababdan Qozog‘istonda yashayotgani haqida gapirib berdi.
Oxirgi 10 yil ichida ko‘proq Qozog‘istonda yashayman. Mendan ko‘pchilik kinoni tashlab ketdingizmi, vatanni tashlab ketdingizmi, immigrant bo‘ldingizmi, deb so‘rashadi. Buning sababini hozir tushuntirmoqchiman.
Do‘stlarim 2012-yilda meni Qozog‘istonga ishga taklif qilishdi. Ular qurolli kuchlar haqida 30 qismli serial boshlashayotgan ekan. Vaqtim bor edi. Bordim, gaplashdik, serialni suratga olishdan avval qurolli kuchlar uchun 6-7 rolik suratga oldik. O‘sha serialning rejissorligini qildim.
U vaqtda turmush o‘rtog‘im bilan ajrashgandim. O‘sha serialni ishlayotganimizda eski tanishimni ko‘rib qoldim. Ko‘rishib, uchrashib, gaplashganimizdan so‘ng ota-onasidan ruxsat so‘rab, uning farzandlarining oldidan o‘tib, masjidga va ‘ZAGS’ga borib, nikohdan o‘tib, Qozog‘istonda qolib ketdim.
Shu sababdan ko‘proq vaqt Qozog‘istonda bo‘laman, kamroq vaqt Toshkentda bo‘laman. Chunki Qozog‘istonda umr yo‘ldoshim, hovli-joyimiz, ro‘zg‘orimiz, ishimiz bor.
Ayolimning kasbi ham kinoga yaqin, ular ovoz rejissori bo‘lib, kino-bastakor bo‘lib ishlaydilar. Bundan tashqari, ayolim bilan ssenariy yozib, film suratga oldik. O‘zimizning do‘stlarimiz bilan yangi yilga to‘g‘ri keladigan, yengil kino komediya suratga oldik.
Qozog‘istonda ham bekor o‘tirmayapmiz, u yerda ham o‘zimning sevimli kasbim bilan mashg‘ulman.
Furqat Fayziyev, aktyor, rejissor
Ma’lumot uchun, Furqat Fayziyev 1968-yil, 7-may kuni Toshkent shahrida tug‘ilgan. 109 filmda bosh va turli darajadagi rollarni ijro etgan.
