Ijtimoiy tarmoqlarda bir qizning Shimoliy Farg‘ona kanalida cho‘kib ketgani haqida videotasvir tarqalgan. Holat yuzasidan Namangan viloyati IIBning rasmiy munosabat e’lon qildi.
Viloyat Favqulodda vaziyatlar boshqarmasi mas’ul xodimining bergan ma’lumotiga ko‘ra, 2021-yilning 15-iyun kuni soat 14:30 da Pop tumani FVBga tumandagi “Anhor” MFYda yashagan, 2009-yilda tug‘ilgan voyaga yetmagan qiz mahalla hududidan oqib o‘tgan Shimoliy Farg‘ona kanaliga tengdoshlari bilan birga cho‘milish maqsadida borib, suvga tushgan va qaytib chiqmagan. Bu haqda kelib tushgan tezkor xabardan so‘ng oradan 10 daqiqa o‘tgach, tuman FVB xodimlari voqea joyiga yetib kelib, suv usti qidiruv ishlarini olib borgan.
Soat 16:00 larda Namangan viloyati FVB g‘avvoslari tomonidan kanal yo‘li 4,5 metrlik setka bilan to‘silib, suv osti qidiruv ishlari olib borilgan.
Qidiruv ishlari hozirga qadar (16-iyun) davom etmoqda. Ushbu ishga Namangan viloyati va Pop tuman FVBdan 20 nafar, IIBdan 6 nafar xodim jalb etilib, yerusti va suv osti qidiruv ishlari davom ettirilmoqda.
Bundan avval Buxoroda suvga cho‘kib ketgan maktab o‘quvchisining jasadi bir kundan keyin topilgani, Nukusda o‘zini kanalga tashlagan qiz qutqarilgani hamda Toshkentdagi Bo‘rijar kanalida cho‘kib ketayotgan ikki kishini qutqarib qolgan FVV xodimlaridan biri halok bo‘lgani haqida xabar berilgandi.
Izoh (0)