Noodatiy xamirli taom — avarcha hinkal retsepti

Avar hinkalini Dog‘iston, Checheniston va Shimoliy Kavkazning boshqa mintaqalarida tatib ko‘rish mumkin. Ushbu noodatiy xamirli taom qaynatilgan go‘sht va mazali sho‘rvaning ajoyib uyg‘unligi bilan ajralib turadi.

Kerakli masalliqlar:

• suyakli mol go‘shti — 1 kg;
• suv — 3 l;
• tuz — 2 choy qoshiq;
• un — 800 g;
• ichimlik sodasi — 1 choy qoshiq;
• kefir — 500-600 ml;
• tuxum — 1 ta;
• kartoshka — 5-6 ta;
• sarimsoq — 2-3 bo‘lak;
• pomidor — 2 ta;
• smetana.

 Tayyorlanish jarayoni:

1. Go‘shtli suyakni qozondagi sovuq suvga solib, qaynashga kelganda ko‘pigini oling. 20-30 daqiqadan keyin kartoshka solib, 2 soat davomida qaynating.
2. Sho‘rva tayyor bo‘lguncha elangan unga ichimlik sodasi va tuz solib aralashtiring.
3. Kefirga tuxumni chaqib, sanchqi bilan yaxshilab aralashtiring va unli massaga qo‘shib, xamir qoring.
4. Xamirni zuvala qilib, ustini sochiq bilan yoping va 30 daqiqaga tindiring.
5. Sho‘rvadan go‘sht va kartoshkani suzib olib, go‘shtni o‘rtacha kattalikda to‘g‘rang.
6. Tingan xamirni 10-15 mm qalinlikda yoyib, romb shaklida kesib oling.
7. Qaynab turgan sho‘rvaga kesilgan xamir bo‘laklarini solib, 3-4 daqiqa qaynating.
8. Pishgan xamirlarni laganga suzib, har birini sanchqi bilan teshib qo‘ying.
9. Xamir ustiga to‘g‘ralgan kartoshka va go‘sht soling. Hinkalni sho‘rva, pomidor-sarimsoqli yoki smetanali sous bilan dasturxonga torting.

Yoqimli ishtaha! Mavzuga doir: 

• Iftorlikka Madina Mumtoz retsepti asosida tez tayyor bo‘ladigan va xushta’m KFC stripslarini tayyorlab ko‘ring (video)
• To‘yimli va mazali: vitaminlarga boy 4 ta sabzavotli kotlet retsepti
• Pitssadan ancha oson: Iftorlikka pishloq va kolbasa qo‘shib mazali pirog pishiring
• Chig‘anoq shaklidagi makaronlar ichiga qiyma va ismaloq to‘ldirib, mazali taom tayyorlang