Jizzax viloyati Sharof Rashidov tumanida 7-may kuni Isuzu va “KamAZ” ishtirokidagi yo‘l-transport hodisasi sodir bo‘ldi. Bu haqda viloyat YHXB axborot xizmati xabar berdi.

Foto: Videodan skrinshot

Ma’lum qilinishicha, 7-may kuni soat 03:10 da M-39 Olmaota–Toshkent–Termiz xalqaro avtomobil yo‘lining Sharof Rashidov tumanidan o‘tuvchi 976-kilometrida odam o‘limi bilan bog‘liq yo‘l-transport hodisasi sodir bo‘lgan.

Qashqadaryo viloyati Kitob tumanida yashovchi 1992-yilda tug‘ilgan haydovchi Isuzu yuk mashinasini Toshkent–Termiz yo‘nalishi bo‘ylab boshqarib kelayotib, uxlab qolgan.

Shundan so‘ng o‘zidan oldinda yo‘l chetida to‘xtab turgan Qashqadaryo viloyatida yashovchi, 2000-yilda tug‘ilgan haydovchi boshqaruvidagi “KamAZ”ga borib urilgan.

Oqibatda “KamAZ” haydovchisi og‘ir tan jarohatlari olib, voqea joyida halok bo‘lgan.

Bundan avval Qashqadaryoda “Jiguli” va Nexia ishtirokida sodir bo‘lgan YTH oqibatida 7 kishi halok bo‘lgani, Toshkent viloyatida o‘zini “Oysha xola” deya tanishtirgan YPX xodimiga xizmat tekshiruvi tayinlangani hamda Buxoroda qarshisidagi mashinani quvib o‘tishga uringan Nexia traktorga borib urilgani haqida xabar berilgandi.