“Auto.ru” saytida 2020-yilgi Ford F-150 bazasida yaratilgan Maus yo‘ltanlamasi sotuvga qo‘yilgani to‘g‘risida e’lon paydo bo‘ldi. Hashamatli interyer va 650 ot kuchiga ega dvigatel o‘rnatilgan eksklyuziv avtomobil 28,7 million rublga (380 ming dollar) baholanmoqda, deb xabar beradi Motor.
Noyob yo‘ltanlamasni yaratish bilan Qozog‘istonning EXC Motors kompaniyasi mutaxassislari shug‘ullangan. Muhandislar donor sifatida oldingi avlod Ford F-150 pikapidan foydalanib, uning faqatgina old optikasini saqlab qolgan. Transport vositasining qolgan eksteryeri tanib bo‘lmas darajada o‘zgartirilgan. Maus nomini olgan modifikatsiya qilingan avtomobil beshta eshikli zirhli mashinaga o‘xshaydi.
Tyunerlar mashinaning tag qismi yer yuzasi orasidagi masofani 310 millimetrga qadar uzaytirgan, shuningdek, yo‘ltanlamasga 22 dyuymli g‘ildirak diskalari kiygizilgan. Qora xira rangga bo‘yalgan yo‘ltanlamasning uzunligi modifikatsiya sabab 6000 millimetrga yetgan, eni esa 2300 millimetrni tashkil etadi. Maus eksklyuziv kuzov detallari, bamper va g‘ildirak akralarini himoyalovchi “nakladkalar”, shuningdek, qo‘shimcha yoritish tizimiga ega bo‘lgan.
Yo‘ltanlamasning interyeri ham sezilarli darajada o‘zgarishga uchragan. Qisman timsoh terisi bilan qoplangan salonda qo‘shimcha divan, qo‘shimcha boshqarish funksiyalariga ega ikkita alohida o‘rindiq paydo bo‘lgan. Avtomobil o‘lchami uzaytirilgani sabab orqa o‘rindiqdagi yo‘lovchilarning oyoqlari uchun bir metrga yaqin keng joy paydo bo‘lgan.
Modifikatsiya qilingan yo‘ltanlamas 650 ot kuchiga ega 5,5 litrli benzin dvigatel yordamida harakatga keladi. Agregat 6 pog‘onali avtomatik transmissiya yordamida boshqariladi. Mutaxassislarning aytishicha, ular bu kabi avtomobildan 21 nusxa yaratgan.
Avvalroq Ukrainada tanib bo‘lmas darajada o‘zgartirilgan Mercedes-Benz E-Class 10 ming dollarga sotilayotgani to‘g‘risida xabar berilgandi.
Izoh (0)