Navoiy viloyati Xatirchi tumanida 7,2 tonna suyultirilgan gazni talon-toroj qilayotgan shaxslar ushlandi, deya xabar bermoqda Bosh prokuratura huzuridagi Departament matbuot xizmati.
Qayd etilishicha, Departament, DXX hamda IIBning Navoiy viloyati boshqarmalari tomonidan o‘tkazilgan tezkor tadbirda “Xatirchi-Uchqara” gaz to‘ldirish shoxobchasi mansabdor shaxslari fuqaro S.A.ga aholi iste’moli uchun ajratilgan 7,2 tonna suyultirilgan gazni har bir kilogrammini 2,5 ming so‘mdan hisoblab, 300 AQSh dollari va 14,9 million so‘mga sotgan vaqtida ashyoviy dalillar bilan ushlangan.
Bundan tashqari, shoxobcha mansabdor shaxslari umumiy qiymati 16,2 million so‘mlik 5 tonna suyultirilgan gazni hisobotlarga qo‘shib yozish orqali ortiqcha chiqim qilib, o‘zlashtirish yo‘li bilan talon-toroj qilganligi aniqlangan.
Mazkur holat yuzasidan Jinoyat kodeksining 167-moddasi (talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Andijonda 50 nafar kam ta’minlangan fuqaroga ajratilgan mablag‘lar talon-toroj qilingani, Andijonda “Agrobank” xodimi 219,5 million so‘mni talon-toroj qilgani hamda Buxoroda fuqarolar nomiga rasmiylashtirilgan 215 million so‘m mikroqarzni o‘zlashtirgan MChJ rahbari va bank xodimiga jinoyat ishi qo‘zg‘atilgani haqida xabar berilgandi.
Izoh (0)