Grechkani ratsionga kiritish uchun 5 sabab va mazali tayyorlash usuli

Grechkaning nima uchun foydali ekani va dunyo oshxonalarida insonlar uning sevishiga sabab nimada ekaniga to‘xtalib o‘tamiz.

Universal va asosiysi foydali ekani sabab ham sog‘lom ovqatlanish bo‘yicha aksariyat mutaxassislar grechkani superfud, deb hisoblaydi. Ushbu mahsulot aminokislota, temir, kalsiy, kaliy, fosfor, yod, ftor, shuningdek, B1, B2, B9 vitaminlarini o‘z ichiga oladi.

Grechkani sevib iste’mol qilish uchun 5 sabab:

1. Grechka oqsilga boy va uglevodi kam bo‘lgan parhezli mahsulot sanaladi. Glikemik ko‘rsatkichi kam ekani sabab, iste’molidan keyin kishi semirib ketmaydi.
2. Tarkibida glyuten bo‘lmagani sabab ham ushbu mahsulot seliakiydan aziyat chekadigan ya’ni organizmi glyutenni ko‘tara olmaydigan kishilar uchun ayni muddao.
3. Qon aylanishini yaxshilab, immun tizimini mustahkamlaydi. Shu sabab ham qon tomir kasalliklari, artrit va revmatizmdan aziyat chekadigan bemorlarga iste’mol qilish tavsiya qilinadi.
4. Organik kislotalar mujassamligi sabab hazm jarayonini jadallashtiradi.
5. Tarkibida B guruhi vitaminlari, kalsiy hamda kollagen sintezini yaxshilaydigan moddalar bisyor ekani sabab ham grechka dermatologik davolash va teri kasalliklarini bartaraf qilishda ishlatiladi.

Undan bo‘tqa, sho‘rva, lapsha tayyorlash, garnir sifatida dasturxonga tortish, hatto o‘zidan alohida ovqat tayyorlash ham mumkin. Dunyoning eng yaxshi restoranlarida grechotto nomli taom mijozlarning sevgisiga sazovor bo‘lib ulgurgan. Rizottoni esga soladigan taomning farqi guruch o‘rniga grechka ishlatilishida.

Pishloq va petrushka solib tayyorlanadigan grechottoni tayyorlash uchun quyidagi mahsulotlar kerak bo‘ladi:

• grechka — 1 stakan;
• piyoz — 1 dona;
• sarimsoq piyoz — 2 dona;
• zaytun yog‘i — 1 osh qoshiq;
• sariyog‘ — 1 osh qoshiq;
• bulyon — 500 ml;
• pishloq — 100 g;
• tuz, murch.
• petrushka.

Tayyorlanish jarayoni:

• O‘simlik yog‘i solingan tovada piyoz va sarimsoqni solib qovurib oling.
• Grechka solib, 2 daqiqa qovurishda davom eting.
• Bulyon qo‘shib, aralashtirishda davom eting.
• Pishloq, tuz qo‘shing. Dasturxonga tortishdan avval ko‘katlar bilan bezang.