Markaziy bank ma’lumotiga ko‘ra, O‘zbekiston tashqi qarzi 2020-yil yakunlariga ko‘ra 33,8 milliard dollarni tashkil qildi. Spot’ning yozishicha, 2020-yilda u 37,4 foizga yoki 9,2 milliard dollarga oshdi.
“Bunda 2019-yildan boshlab davlat tashqi qarzi keskin o‘sishini kuzatish mumkin”, — deya e’tibor qaratgan Markaziy bank.
Tashqi qarz davlat va xususiy qarzdan iborat. Birinchisi 21,3 milliard dollarni tashkil qilgan va asosan yangi tashqi qarz jalb qilinishi va davlat qimmatli qog‘ozlarining chiqarilishi hisobiga 5,4 milliard dollarga o‘sgan. Xususiy qarzdorlik 3,7 milliard dollarga oshib, 12,5 milliard dollarni tashkil qilgan va asosan banklar hissasiga to‘g‘ri kelgan:
Qarzlarni to‘lashga kelsa, 2020-yilda davlat qarzi bo‘yicha 651,3 million dollar miqdordagi asosiy qarz va 380,2 million dollar foiz to‘lovlari amalga oshirilgan, xususiy qarz bo‘yicha esa mos ravishda 2 milliard dollar va 370,8 million dollar qarz qaytarilgan.
Moliya vazirligi tomonidan e’lon qilingan “2021-yilgi fuqarolar uchun budjet” loyihasida O‘zbekistonning jami davlat qarzi 2021-yil yakunida 28,4 milliard dollarga (YaIMga nisbatan 44,9 foiz) yetishi prognoz qilinmoqda. Moliya vazirligi esa buni xavfsiz darajada deb hisoblamoqda.Mavzuga doir: O‘zbekistonda tashqi qarzlar sarfi bo‘yicha ochiq ma’lumotlar bazasi shakllantiriladi
