Prezident Shavkat Mirziyoyev 18-mart kuni Chirchiqqa amalga oshirgan tashrifi davomida shahardagi 35-uy, 45-xonadonda yashovchi Anife Bektoshova oilasida bo‘ldi.
“O‘zbekiston 24” telekanalining ma’lum qilishicha, Anifening ikki o‘g‘lidan biri bundan uch yil oldin basseynga noqulay sakrab umurtqasi, oyog‘idan qattiq lat yegan. Xokkey bilan shug‘ullanadigan yana bir o‘g‘lining ham oyog‘ida muammo bor.
“Bizdan, tibbiyotimizdan biror yordam kerakmi? Senga nima yordam bera olamiz?”, — deya Prezident yigitlardan birining sog‘lig‘i bilan qiziqqan.
Yigit reabilitatsiya uchun yordam kerakligini, biroq davolanishda asosan o‘zi harakat qilishi lozimligini, sog‘ayishi organizmiga bog‘liqligini ta’kidlagan. Shu bilan birga, u davolanishiga yordam berishga qodir murabbiy topganini, biroq uning Toshkentdan kelib, 12 soat shug‘ullanishi 100 dollar ekanini ma’lum qilgan.
“Murabbiy kelsin, keyin Sog‘liqni saqlash vazirligidan ham birortasi kelsin. U bilan gaplashsin, doktor sifatida nima kerak bo‘lsa, yordam bersin”, — deya topshiriq bergan davlat rahbari.
“Biz uni oyoqqa turg‘azish uchun qo‘limizdan kelganini qilamiz. Xorijga jo‘natish kerak bo‘lsa, masalan, Germaniyaga — buni ham amalga oshiramiz. Ertaga bu yerga mutaxassislar, institut direktori ham keladi. Bu ayol bilan biz bog‘lanamiz [murabbiy — tahr.], qancha kerak bo‘lsa, shuncha to‘laymiz. Xorijda reabilitatsiya kerak desa, uniyam yo‘lini qilamiz”, — deydi Shavkat Mirziyoyev.
Davlat rahbari barchasi Xudodan ekanini, yigitga qo‘ldan kelguncha yordam ko‘rsatilishini ta’kidlagan.
Avvalroq Shavkat Mirziyoyev Chirchiqqa tashrifi chog‘ida “Iftixor” mahallasi aholisi bilan suhbatlashgani, Prezident shahar aholisi bilan suhbat davomida Chirchiq shahrida “elektrichka” yo‘lga qo‘yilishini aytgani to‘g‘risida xabar berilgandi.
Izoh (0)