AQSh prezidenti Jo Bayden 24-fevral, chorshanba kuni o‘zidan avvalgi davlat rahbari Donald Trampning yana bir farmonini — mamlakatga ayrim toifadagi chet elliklarning kirishini taqiqlovchi hujjatni bekor qildi, deb yozadi Oq uy matbuot xizmatiga tayanib, “RBK”.
O‘tgan yilning aprelida Tramp COVID-19 pandemiyasi davrida Amerika mehnat bozori uchun xavf tug‘diradigan chet elliklarning AQShga kirishini taqiqlovchi hujjatni imzolagan edi. Keyinchalik sobiq prezident farmon muddatini ikki marotaba uzaytirgan.
Bayden hujjat AQSh manfaatlarini himoya qilmasligini aytib, uning amal qilishini to‘xtatdi. “Bu AQShga zarar yetkazadi, shu jumladan, AQSh fuqarolari va qonuniy rezidentlari oila a’zolarining o‘z oilalari qayta birlashishiga xalaqit beradi. Bu, shuningdek, AQSh iqtisodiyotining turli mamlakatlardan kelgan mutaxassislar ishlaydigan tarmoqlariga ham zarar yetkazadi. Va bu har yilgi lotereya doirasida immigratsion vizalarni qo‘lga kiritgan odamlarga ham zarar keltiradi”, — deya o‘z pozitsiyasini izohladi davlat rahbari.
Lavozimiga kirishganidan keyin Bayden Tramp tomonidan qabul qilingan bir nechta farmonlarni bekor qildi. Fevral boshida u Meksika bilan chegarani noqonuniy kesib o‘tgan ota-onalar va bolalarni qayta birlashtirish haqida farmoyish bergandi. Bunday amaliyotni Tramp “muhojirlarga nisbatan nol tolerantlik” siyosati doirasida joriy qilgan.
Keyinroq Davlat departamenti BMT huzuridagi Inson huquqlari kengashiga qaytish niyatini ma’lum qildi, undan Tramp mamlakatni uch yil avval olib chiqqan edi. 19-fevral kuni Bayden AQShni iqlim bo‘yicha Parij bitimiga qaytardi, u esa atmosferaga uglerod ajratib chiqarishni kamaytirish va sanoatni modernizatsiya qilishni ko‘zda tutadi.
Shu kuniyoq Vashington avvalgi prezidentning Eronga qarshi sanksiyalarni qayta tiklash haqidagi BMTga kiritilgan arznomasini qaytarib oldi. Tramp davrida AQSh “yadro bitimi”dan chiqib, Tehronga sanksiyaviy bosimni yana boshlagan edi. Bayden Eron bilan bitimni qayta tiklashga tayyorligini bildirdi.
Mavzuga doir:
- Bayden Tramp davrida qabul qilingan qoidalarni bekor qiluvchi migratsiyaga oid bir nechta farmonlarni imzolaydi
- Musulmon mamlakatlar aholisi uchun cheklov bekor qilindi, Meksika bilan chegarada esa devor qurilmaydi. Bayden prezidentlikning birinchi kuniyoq Trampning eng bahsli farmonlarini bekor qildi
- Bayden Trampning iqlim bo‘yicha Parij bitimi va JSSTdan chiqish to‘g‘risidagi qarorlarini bekor qildi
Izoh (0)