Dunyo pandemiyaga qarshi kurashda birlashishi, kelishmovchiliklarni unutishi kerak. Chunki bir nechta davlat vaksinatsiyadan bosh tortsa, dunyoda kollaps tahdidi yuzaga keladi. Bu haqda Rossiya davlat Dumasining Sog‘liqni saqlash qo‘mitasi a’zosi Boris Mendelevich ma’lum qildi, deb xabar bermoqda “RIA Novosti”.

Foto: “RIA Novosti”

Xabarda aytilishicha, bundan avval Rossiya prezidenti Davosda bo‘lib o‘tgan Jahon iqtisodiy forumida bir qator mamlakatlarning koronavirusga qarshi vaksinaga ega bo‘lolmasligi butun dunyo uchun katta tahdidga sabab bo‘lishi mumkinligini bildirgan.

“Agar bir nechta davlatlar COVID-19 tarqalishiga qarshi kurashish usuli sifatida vaksinatsiyadan bosh tortsa, u holda oqibatlarini tasavvurga sig‘dirish qiyin bo‘lgan global kollaps, lokdaunga olib kelishi mumkin. Shuning uchun barchamiz birlashib, kelishmovchiliklarni unutib, pandemiyaga qarshi kurashda katta jamoa bo‘lib, birdek harakat qilishimiz kerak deb o‘ylayman”,  — degan Mendelevich.

Uning ta’kidlashicha, koronavirus bilan bog‘liq vaziyat barqarorlik va odatiy turmush tarzi qanchalik nozik bo‘lishi mumkinligini ko‘rsatdi.

“Shu nuqtayi nazardan, bugungi kunda vaksina bu — vaqti kelib hayot va sog‘liq uchun xavfsiramasdan muloqot qilish imkonini beradigan yagona vosita. Ha, bizning mamlakatda vaksinatsiya ixtiyoriy va har bir inson emlanish to‘g‘risida qarorni o‘zi qabul qiladi. Ammo men shifokor sifatida emlanish tarafdoriman va o‘zim ham emlandim”, — deya qo‘shimcha qilgan u.