Yangi choralar joriy etilishi haqida Buyuk Britaniya bosh vaziri Boris Jonson 4-yanvar kuni xalqqa qilgan murojaatida e’lon qildi, deb yozadi “RBK”.
“Virusning yangi varianti qo‘rqitadigan darajada tez tarqalmoqda. Uchinchi milliy lokdaun zarurligi aniq-ravshan”, — dedi Jonson.
Jonsonning so‘zlariga ko‘ra, koronavirusning yangi shtammi tarqalishni boshlamaganida, yangi choralarga zarurat qolmagan bo‘lardi. “Bizning COVID-19’ga qarshi kurashdagi jamoaviy harakatlarimiz ish bergan va agar virusning yangi turi chiqmaganida edi, ish berishda davom etgan bo‘lardi”, — dedi Jonson.
Cheklovlar doirasida Buyuk Britaniyadagi barcha boshlang‘ich va o‘rta maktablar masofadan o‘qishga o‘tadi. Bundan tashqari, 6-yanvardan butun mamlakat bo‘ylab majburiy yakkalanish joriy etiladi — fuqarolar faqat ishga borish, oziq-ovqat va eng zarur narsalarni sotib olish, tibbiy yordam olish yoki sport bilan shug‘ullanish uchungina uydan chiqishi mumkin bo‘ladi.
Ikki oy ichida Buyuk Britaniyada koronavirus infeksiyasiga chalinish darajasi ikki karra o‘sib, har 100 ming aholiga 519 ta holatga yetdi.
