Mehmonxonadagi uy, “samoviy” maosh, mashinalar. Futbol olamini ostin-ustun qilib yuborgan Pep Gvardiola qanday hayot kechiradi?

Bugungi kunda zamonaviy futbolni Xosep Gvardiolasiz tasavvur qilib bo‘lmaydi. “Barselona” ham aynan uning davrida misli ko‘rilmagan yutuqlarga erishgan. Shuning bilan birga u “Bavariya” va “Manchester Siti”ni ham yangi bosqichlarga olib chiqqani bilan ham bemalol maqtana oladi. Muxtasar aytganda, Pep atigi 40 yoshida butun futbol olamini ostin-ustun qilib yuborgandi. Hozir u 49 yoshda. Xo‘sh, chetdan qaraganda doimo allanimalarni o‘ylab yuradigan daho qanday hayot kechiradi o‘zi? Quyida ushbu savolga to‘xtalamiz.

Qayerda yashaydi?

Pep Manchester markazidagi City Suites mehmonxonasida yashaydi. Ushbu mehmonxonada bir kecha tunash narxi 75–230 funt sterlingni tashkil qiladi.

U yerda hashamatli hayot uchun kerak bo‘lgan hamma narsa mavjud: suzish havzasi, sport zali, bar, restoran va hokazolar.

Bino shahar markazida joylashgani bois u yerdan istalgan joyga borish qulay. Pep “Etihad”ga yetib olish uchun atigi 3 kilometr bosib o‘tsa bo‘lgani.

Ammo Pep ushbu mehmonxonadagi xonadonni ijaraga olmagan, balki uni to‘laligicha sotib olgan. Ushbu mulk ispaniyalikka 2,7 million funtga tushgan. Aytishlaricha, bundan tashqari Pepning Nyu-Yorkda ham uyi bor ekan.

Mashinalari

Shu pallada bir savol tug‘iladi. Xo‘sh, Gvardiola mashinalarini klub bazasida saqlaydimi yoki mehmonxona avtoturargohida? Boisi uning ixtiyorida bir qancha mashinalar bor.

Ular orasida Bentley, Audi, Mercedes kompaniyalarining mashinalarini ko‘rish mumkin. Shuningdek, Pep Range Rover va Mini Cooper’ga ham egalik qiladi.

Shaxsiy hayot

Ispaniyalik dahoning rafiqasi Kristina Serra mashhurlik borasida o‘ziga teng kela olmasa-da, yetarli darajada taniqli. U Ispaniyada ikkita moda butiklariga egalik qiladi. Shunga qaramay Kristina iloji boricha ommaga ko‘rinmaslikka va intervyular bermaslikka harakat qiladi. Biroq u muntazam ravishda “Manchester Siti” o‘yinlariga tashrif buyurib turadi. Juftlik ikki o‘g‘il va bir nafar qiz farzandni voyaga yetkazmoqda.

Do‘stlari

Murabbiyning do‘stlari haqida gap ketganda, Pep ularni imkon qadar oshkor qilmaslikka harakat qiladi. Gvardiola o‘zining 48 yoshga to‘lganida, jurnalistlar undan ushbu bayramni kim bilan nishonlashi haqida so‘ragan. Pep esa bunga javoban: “Uyda, oilam bilan. Mening do‘stlarim yo‘q”, – degandi.

Biroq ma’lumotlarga ko‘ra, daho yoshligidan “Barselona” sobiq bosh murabbiyi Tito Vilanova bilan juda inoq do‘st bo‘lgan. Titoning bevaqt o‘limi esa Gvardiolaga juda qattiq zarba bergan.

Shuningdek, ispaniyalik murabbiyning “Real” sobiq hujumchisi Raul bilan yaqin munosabatlarda ekanligi aytiladi. Pep “Bavariya”ga o‘tish haqida aynan Raul bilan maslahatlashgan ekan.

Futboldan tashqari qiziqishlar

Ko‘pchilik muxlislar bilishadiki, Gvardiola har doim kiyinish uslubiga alohida e’tibor qaratgan. Hatto The Telegraph nashri 2017-yilda uni dunyoning eng zamonaviy (kiyinish uslubi borasida) erkaklar o‘nligiga kiritgandi. Shuningdek, Pep bo‘sh vaqtlarida xarid qilish, ovqat tayyorlash, musiqa tinglash va shaxmat o‘ynashni xush ko‘radi.

Daromadi

Gvardiola futbolda o‘z imzosi, prinsiplari va yutuqlariga ega yuqori darajadagi murabbiylardan hisoblanadi va shunga yarasha haq talab qiladi. U “shaharliklar” bilan noyabr oyida imzolagan yangi shartnomasiga (2023-yilgacha mo‘ljallangan) ko‘ra, yiliga 22 million funt maosh oladi. Taqqoslash uchun uning hamkasbi va hamshahari Sulsherda bu ko‘rsatkich 7,5 million funtga teng.