AQShning amaldagi prezidenti Donald Tramp agar demokratlar Senatda ko‘pchilik ovozga ega bo‘lsa, ular mamlakatni kommunizmga olib borishini aytdi. “RBK”ning yozishicha, bu haqda u Jorjiadagi tarafdorlari oldida chiqish qilgan paytida aytgan.
“Jorjia saylovchilari har bir qo‘mitani qaysi partiya boshqarishini, har bir qonun hujjatini imzolash, soliq to‘lovchining har bir dollarini nazorat qilishni belgilaydi. Juda oddiy. Farzandlaringiz sotsializmda yashaydimi yoki erkin mamlakatda katta bo‘ladimi, o‘zingiz hal qilasiz”,— degan Tramp.
Uning fikricha, sotsializm demokratlar uchun “faqat boshlanish xolos”. “Keyin ular bu yerda boshqaruvning kommunistik shaklini ornatishga harakat qiladi, meni bunga shubham yo‘q”, — deb ta’kidlagan prezident.
AQShda 3-noyabr kuni prezidentdan tashqari, vakillar palatasi va Senatning uchdan bir qismi, shuningdek, 13 shtat va hudud gubernatorlari qayta saylandi. The New York Times’ning hisoblashicha, ovoz berish natijalariga ko‘ra demokratlar quyi palata ustidan nazoratni saqlab qoldi.
Ayni paytda Senatda (kongress yuqori palatasi) ko‘pchilik o‘rin respublikachilarga tegishli. Uning 100 nafa a’zosidan 53 nafari respublikachi, 45 nafari demokrat, ikki senator partiyasiz.
Jorjiada, aksariyat Amerika shtatlaridan farqli o‘laroq, Senat saylovlarida g‘alaba qozonish uchun 50 foiz va yana bitta ovoz kerak. Joriy saylovlarda nomzodlarning hech biri kerakli miqdordagi ovozni ololmadi, shuning uchun 2021-yilning 5-yanvarida ushbu shtatda Senat saylovlarining ikkinchi bosqichi bo‘lib o‘tadi.
CNN ma’lumotlariga ko‘ra, respublikachi va demokratlar endi navbatdagi senatda har biri 48 o‘ringa egalik qilib, teng ovoz bilan ketmoqda. Agar demokratlar ikki mandat o‘ynalayotgan Jorjiada g‘alaba qozonsa, hisob tenglashadi. Agar demokratlar nomzodi Jo Bayden prezidentlik saylovlarida g'olib chiqsa, demokratlarga 50 ta ovoz ham yetarli bo‘ladi, chunki bu holda vitse-prezident Kamala Xarris Senat raisi bo‘ladi.
Izoh (0)