Pop tumani hokimi hududdagi tashkilotlar rahbarlarini paxta terimiga majburlagani uchun jarimaga tortilgan

Namangan viloyatining Pop tumani hokimi hududdagi tashkilotlar rahbarlarini paxta terimiga majburiy jalb qilgan. Bu haqda Odam savdosiga va majburiy mehnatga qarshi kurashish Milliy komissiyasining 4-dekabr kuni bo‘lib o‘tgan yig‘ilishida ma’lum qilindi, deya xabar bermoqda “Daryo” muxbiri Bekjon Jo‘raqulov.

Pop tumani hokimi A’zamjon Sultonov hududdagi tashkilotlar rahbarlarini 2020-yilgi paxta yig‘im-terimiga majburiy jalb qilgani uchun jarimaga tortilgan.

Bundan tashqari, Namangan shahridagi qurilish mollari bozori rahbariyati tadbirkorlardan paxta kampaniyasiga terimchi yollash uchun 800 ming so‘mgacha pul talab qilgan.

Avvalroq 2020-yilgi paxta terimi mavsumida majburiy mehnat bilan bog‘liq qonun buzilishi holatlarining 42 foizi Namangan viloyatida qayd etilgani haqida xabar berilgan edi — bu mamlakat bo‘yicha eng yuqori ko‘rsatkichdir. Shuningdek, paxta terimi mavsumida majburiy mehnatga sharoit yaratib berilgani uchun viloyatning Chortoq tumani hokimi A.Otaxo‘jayev va Uchqo‘rg‘on tumani hokimi A.Vahobovga hukumat farmoyishiga asosan hayfsan berilgan va ushbu holat yana takrorlanadigan bo‘lsa, egallab turgan lavozimidan ozod etilishi bo‘yicha ogohlantirilgan.