Qishki shpargalka: Sharfni ustki kiyimga moslashda nimalarga e’tibor berish kerak?

Sharf nafaqat obrazni o‘ziga xos ko‘rsatadi, balki qishda sovuq qotmaslik uchun ham ayni muddao hisoblanadi. Ammo obraz chiroyli ko‘rinishi uchun uni tutishda mavjud qoidalarga amal qilish kerak.

Sharfni ustki kiyim bilan bir xil rangdagi, ammo turli fakturaligini tanlash mumkin. Bundan tashqari sharf obrazingizga urg‘u berishi mumkin. Buning uchun to‘q rangda kiyingan bo‘lsangiz boshqa yorqin rangli sharfni tutish tavsiya etiladi.

Agar paltongiz “zapax”li yoki old qismi V bichimli bo‘ladigan bo‘lsa, unda sharfni shunchaki bo‘yinda aylantirmasdan tashlamasdan vertikal chiziq hosil qiladigandek tutish kerak. Bunda qomat yanada proportsional ko‘rinadi.

Sharfni zamonaviy taqishning yana bir usuli uni bir yoki ikki tarafini bel ichiga kamarga qistirish hisoblanadi. Sharf rangi ustki kiyim rangidan farq qilishi ham uning ranglariga mos bo‘lishi ham mumkin.

Agar ustki kiyim yoki palto yoqasi kichik yoki “stoyka” yoqali hamda ustki kiyim keng va qalin bo‘ladigan bo‘lsa, unda sharfni kiyim ustidan emas ichidan tutgan yaxshi. Bunday modellar bilan sharf kiyim ustidan tutilsa, qomat proportsiyasi xunuk ko‘rinadi.

Sharf va shapka komplekt bo‘lishi shart emas. Ular turli rangda, ammo o‘xshash fakturada bo‘lishi mumkin. Bundan tashqari, sharf printlaridan birini o‘zida mujassam qilgan shapkani tanlash ham mumkin.

Unutmang, ustki kiyim matosi qanchalik qalin bo‘lsa, sharf ham shunga yarasha bo‘lishi kerak. Shuba, qalin palto bilan shifon yoki ipak matoli sharf taqib olmang, xunuk va didsiz ko‘rinadi. Bunday sharflarni bahor va iliq kunlarda aksessuar sifatida tutgan yaxshi. Qish va sovuq kunlarda esa qalin trikotaj sharflardan foydalangan yaxshi.

Bo‘yin atrofiga sharfni qalin qilib aylantirib olmang. Bunday usul allaqachon urfdan qolgan. Qolaversa, ortiqcha hajm qo‘shib bo‘yin va yelkalarni keng ko‘rsatadi.