O‘zbekistonda 7-sentabr kuni 3,8 balli zilzila yuz berdi

O‘zbekistonda 7-sentabr kuni Toshkent vaqti bilan soat 19:15 da zilzila yuz berdi. Bu haqda Favqulodda vaziyatlar vazirligining Seysmoprognostik monitoring markazi xabar qildi.

Zilzila Toshkent vaqti bilan soat 19:15 da sodir bo‘ldi. Zilzila 30 kilometr chuqurlikda yuz bergan, uning epimarkazidagi kuchi 3,8 ballni tashkil qilgan. Zilzila epimarkazi Toshkent shahridan 305 kilometr janubi-g‘arbiy yo‘nalishda joylashgan.

Zilzila O‘zbekiston hududida uchta shahrida sezilgan:

• Samarqand shahri — 2 ball, zilzila markazigacha bo‘lgan masofa 132 kilometr.
• Buxoro — 2 ball, zilzila markazigacha bo‘lgan masofa 135 kilometr.
• Navoiy — 3 ball, zilzila markazigacha bo‘lgan masofa 50 kilometr.

Eslatib o‘tamiz, O‘zbekistonda 5-avgust kuni ikki marta zilzila kuzatilgandi. 13-avgust kuni Tojikistonda sodir bo‘lgan zilzila O‘zbekiston hududida, 16-avgust kuni Qirg‘izistonda sodir bo‘lgan zilzila kuchi vodiy viloyatlarida sezilgandi. 1-sentabr kuni Tojikiston—Qirg‘iziston chegarasida qayd etilgan zilzila ham O‘zbekistonda sezilgandi.