Garderobidagi kiyimlar rangi ayol kishining qanday fe’l-atvor egasi ekanligidan dalolat beradi

Garderobingizdagi kiyimlar asosan qanday rangdan tashkil topgani sizning ruhiyatingizdagi o‘zgarish, shuningdek, fe’l-atvoringiz qandayligini bildiradi.

Qizil rang

Garderobingizda kiyimlar asosan qizil rangdan iborat bo‘lsa, demak siz energiyali, emotsiyaga boy, o‘ziga e’tibor berishni yaxshi ko‘radigan va chiqishimli insonsiz. Shuningdek, siz faol hayot kechirishni yaxshi ko‘rasiz, miyangiz esa hamisha g‘oya va rejalar bilan band.

Olovrang

Aslida bu rangdagi libos hammaning ham garderobida uchrayvermaydi. Olovrang libos optimist, hayotdan zavqlanishni yaxshi ko‘radigan va atrofda hamisha do‘stlar gavjum bo‘lgan, gina saqlamaydigan inson ekanligingizni bildiradi.

Sariq

Garderobida sariq rang ko‘p bo‘lgan insonning intellekti yuqori bo‘lib, aqliy faoliyatda muvaffaqiyatga erishadi. Bundan tashqari, siz muloqot qilishni yaxshi ko‘radigan, ijodkor shaxssiz.

Yashil rang

Yashil rangda liboslarni ko‘p kiyishingiz, tabiatni yaxshi ko‘rishingiz va istalgan odam bilan ham til topishib keta olishingizdan darak.

Ko‘k rang

Agar sizning garderobingizda ushbu rangdagi liboslar ko‘p bo‘lsa, siz bilan suhbatlashgan odam zerikmaydi, sizning dunyoqarashingiz keng va oqil insonsiz.

Siyohrang

Siyohrangni yaxshi ko‘rgan insonlar ruhiy barkamollikka intiladi. Odamlar bilan muloqot qilish, chiqishish uchun ham siz avvalo ruhan yaqinlikni his qilishingiz muhim sanaladi.

Oq rang

Oq rang — mag‘rurlik va har narsada mukammalikka intilishingizni bildiradi. Siz o‘zingiz va atrofdagilarga ham yetarlicha talab qo‘yadigan, odamlarni atrofingizga yaqinlashtiravermaydigan insonsiz.

Qora rang

Qora rang ko‘pchilik garderobidagi asosiy rang hisoblanadi. Lekin uni, nima kiyishni bilmagandan emas istab xarid qilingan bo‘lsa, demak libos egasi sirli, ambitsiyali inson hisoblanadi. Qora rangni uncha xushlamaydigan, lekin qandaydir vaziyatda qora kiyingan inson ruhiy olamida o‘zgarishlar yoki tushkunlikni boshdan kechirayotgan bo‘lishi mumkin.

Kulrang

Kulrangni asosan e’tibor tortishni xushlamaydigan, sokin va o‘zidan ko‘ngli to‘q insonlar yaxshi ko‘radi. Ular boshqalardan ajralib turishni, diqqat markazida bo‘lishni yoqtirmaydi, o‘z olamida birovga xalaqit bermay yashashni afzal biladi.

Jigarrang

Jigarrang — mehnatkashlik, boshqalarga yordam berishga shaylikni bildiradi, Siz jigarrangni to‘satdan yoqtirib qolgan bo‘lsangiz va bu rangdagi kiyim-kechaklarni odatdagidan ko‘p xarid qilayotgan bo‘lsangiz, demak siz ruhan katta bo‘lyapsiz va hayotingizda o‘zgarishlar bo‘lyapti.

Pushti

Pushti rangni sevgan inson ko‘ngli bo‘sh, nozik va seva olishga qodir bo‘ladi. Bundan tashqari e’tibor va diqqat markazida bo‘lishni yaxshi ko‘radi.