Davlat xizmatlari agentligi Andijon viloyati boshqarmasi axborot xizmatining ma’lum qilishicha, maxsus ruxsatnoma olish uchun joriy yilning 6-aprel kuniga qadar 10 960 ta ariza kelib tushgan. Shundan 9308 tasi rad etilib, 1016 ta avtomobilga maxsus ruxsatnoma berilgan. Bu haqda “Daryo” muxbiri Umidjon Mamarasulov xabar bermoqda.
DXA direktori Halilullo To‘raxo‘jayevning BMW X7 va Mercedes’larga ruxsat olishga ariza berayotgan “uddaburon”larga qilgan murojaatidan so‘ng, 636 ta ariza murojaat qiluvchilar tomonidan qaytarib olingan.
Arizalarni ko‘rib chiqish jarayonida 100 ga yaqin ariza qimmatbaho markadagi avtomashina egalari tomonidan taqdim etilgani va yetarli asosga ega emasligi uchun rad etilgan. Shuningdek, stiker olish toifalariga mos kelmaganlar tomonidan arizalar yuborilishi, belgilangan hujjatlarni to‘liq taqdim etmaslik holatlari ham rad javobi berilishiga asos bo‘lmoqda.
Eslatib o‘tamiz, avtomashinada harakatlanish huquqini beruvchi ushbu maxsus ruxsatnomani qalbakilashtirish, uni sotish, qalbaki ekanligini bila turib undan foydalanish Jinoyat kodeksining 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish)ga asosan javobgarlikka tortiladi.
Izoh (0)