Sirdaryo viloyatida qishloq xo‘jaligiga mo‘ljallanmagan yer uchastkalarini xususiylashtirish tartib-taomillarini aprobatsiya qilish bo‘yicha huquqiy eksperiment o‘tkazish tartibi belgilandi, deb xabar berdi Norma.
Qayd etilishicha, prezidentning 2019-yilning 13-avgustida PF-5780-son farmonida 2020-yil 1-martdan kuchga kiradigan “Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi Qonun qabul qilinishi munosabati bilan eksperiment o‘tkazilishi belgilandi. Eksperiment 1-fevralga qadar davom etadi, uning yakunlariga ko‘ra yangi tartib-taomil va uning alohida mexanizmlarining samaradorligi aniqlanadi. Respublikaning boshqa hududlarida uning qo‘llanilishi shunga bog‘liq bo‘ladi.
Eksperiment doirasida yer uchastkalari quyidagi shakllarda xususiylashtiriladi:
1 – jismoniy va yuridik shaxslar tomonidan ularga doimiy foydalanish (egalik qilish) yoxud meros qilib qoldiriladigan umrbod egalik qilish huquqi bilan berilgan qishloq xo‘jaligiga mo‘ljallanmagan yer uchastkalarini sotib olish. “Yerxususiylashtirish” avtomatlashtirilgan axborot tizimi orqali sotib olinadi. Buyurtma berish tartibi Vaqtinchalik ma’muriy reglamentda belgilangan va Qonunda nazarda tutilganiga o‘xshashdir.
Xususiylashtirilayotgan yer uchastkasining sotib olish qiymati yer uchastkasining maydoni va tashqi omillarning ta’sirini inobatga olib, murojaat turiga qarab belgilanadi va milliy valyutada quyidagi formula orqali aniqlanadi:
yuridik shaxslar uchun: S = K.yur x S x K;
jismoniy shaxslar uchun: S = K.jis x S x K,
bunda:
S – sotib olish qiymati (so‘mda);
K.yur, K.jis – yuridik va jismoniy shaxslar uchun sotib olish qiymatini aniqlashda o‘sha kunda belgilangan yer solig‘i stavkasining 50 baravari (1 kvadrat metr uchun);
S – xususiylashtirilayotgan yer uchastkasining maydoni (kvadrat metrda);
K – yer uchastkalarni sotib olish qiymatini shakllantirish koeffitsiyenti (1 dan 1,15 gacha).
Shuningdek ariza beruvchi “Yerxususiylashtirish” texnik qo‘llab-quvvatlash tizimining sotib olish qiymatining 3 foizini va Yagona billing tizimining sotib olish qiymatining 1 foizini tashkil etadigan xizmatlari haqini to‘lashi lozim. Ijobiy xulosa to‘g‘risida xabarnoma va to‘lov hisobvaraqalari olingan kundan boshlab 10 ish kuni mobaynida to‘lov to‘lanadi. Shundan keyin ariza beruvchiga belgilangan namunadagi order beriladi.
2 – “E-ijro auksion” elektron onlayn-auksioni orqali bo‘sh turgan yer uchastkalarini sotib olish. Unda ishtirok etish uchun zakalat miqdori yer uchastkasi boshlang‘ich narxining 5%i miqdorida belgilanadi. Boshlang‘ich qiymat quyidagi formulalar orqali aniqlanadi:
tadbirkorlik va shaharsozlik faoliyatini amalga oshirish maqsadida beriladigan yer uchastkalari uchun:
S = K.yur x S x K + Rk + Rs + Ra + Rn + Rr;
yakka tartibda uy-joy qurish va uy-joyni obodonlashtirish uchun berilayotgan yer uchastkalari uchun:
S = K.jis x S x K + Rk + Rs + Ra + Rn + Rr,
bunda:
S - xususiylashtirilayotgan yer uchastkasining boshlang‘ich narxi (so‘m);
K.yur, K.jis – sotib olish qiymatini belgilash sanasida yuridik va jismoniy shaxslar uchun tegishlicha belgilangan yer solig‘i stavkasining 50 baravari (1 kvadrat metr uchun);
S – xususiylashtirilayotgan yer uchastkasining maydoni (kvadrat metrda);
K – yer uchastkalarning maydoniga qarab uning sotib olish qiymatini shakllantirish koeffitsiyenti (1,0 dan 1,15 gacha);
Rk – yer uchastkasini tanlash bo‘yicha materiallarni tayyorlash ishlari qiymati;
Rs – arxitektura-rejalashtirish topshirig‘ini tayyorlash ishlari qiymati;
Ra – operator xizmatlari qiymati;
Rn – geoaxborot tizimiga yer uchastkasi chegaralarini kiritganlik uchun ishlar qiymati;
Rr – yer uchastkasiga bo‘lgan huquqni davlat ro‘yxatidan o‘tkazish bo‘yicha ishlar qiymati.
Auksion g‘olibi lot qiymatini u yakunlanganidan keyin 5 ish kunidan kechiktirmay to‘lashi lozim.
Eslatib o‘tamiz, yuridik shaxslar – tadbirkorlik va shaharsozlik faoliyatini amalga oshirish maqsadida bo‘sh yer uchastkalarini xususiylashtirish uchun, jismoniy shaxslar – ushbu maqsadlar uchun, shuningdek yakka tartibda uy qurish va turar joylarga xizmatlar ko‘rsatish uchun auksionda ishtirok etishlari mumkin.
Izoh (0)