Shavkat Mirziyoyev non ishlab chiqarish tannarxini kamaytirish bo‘yicha ko‘rsatmalar berdi, deb xabar bermoqda Prezident matbuot xizmati. Bu haqda davlat rahbari 7-noyabr kuni o‘tkazilgan videoselektorda alohida to‘xtalib o‘tdi.
Vazirlar Mahkamasining 14-oktabrdagi qarori bilan g‘alla yetishtirish, un va non ishlab chiqarish tizimida bozor mexanizmlari joriy etilgan edi. 15-oktabrdan boshlab un va bug‘doyning narxlari erkinlashtirildi va ijtimoiy himoyaga muhtoj aholi qatlamini moliyaviy qo‘llab-quvvatlash maqsadida har bir nafaqa oluvchiga oyiga 50 ming so‘mdan kompensatsiya to‘lanmoqda.
Xabarda aytilishicha, qolipli non bilan kafolatli ta’minlash uchun yetarli resurs zaxirasi yaratilib, un ishlab chiqarishning oylik hajmi O‘zbekistonda 122 mingdan 142 ming tonnaga oshirildi. Bugungi kunda Toshkentda 1 kilogramm un birjada 2300—2400 so‘mdan sotilayotgan bo‘lsa, chakana savdoda qolipli non narxi 1500—1700 so‘mni tashkil qilmoqda.
Yig‘ilishda ayrim viloyatlarda nonning narxi nisbatan yuqoriligicha qolayotgani ko‘rsatib o‘tildi. Avvalroq O‘zbekiston iste’molchilar huquqlarini himoya qilish jamiyatlari federatsiyasi Surxondaryo viloyati va Qoraqalpog‘istonning ayrim hududlarida non narxi 1500—2500 so‘mgacha o‘sgani haqida xabar bergandi.Shuning uchun, Toshkent tajribasidan kelib chiqib, barcha viloyat, tuman va shahar hokimlariga unni birja savdosida sotilishidan boshlab, nonni chakana savdoda sotilishigacha bo‘lgan jarayonni har kuni tahlil qilib, aholining nonga bo‘lgan kunlik ehtiyojini to‘liq ta’minlab borish bo‘yicha vazifalar yuklatildi.
Mavzuga doir: “O‘zdonmahsulot” kompaniyasi “buxanka” narxining oshgani haqidagi xabarlarga munosabat bildirdi
Bundan tashqari, tog‘li va olis hududlarda qish mavsumiga un va boshqa oziq-ovqat zaxirasi yaratish lozimligi qayd etildi.
Izoh (0)