Xalq deputatlari Andijon shahar Kengashining navbatdan tashqari sessiyasi bo‘lib o‘tdi. Bu haqda “Daryo” muxbiri Umidjon Mamarasulov xabar bermoqda.
Sessiyasida shu kunga qadar shahar hokimi vazifasini vaqtincha bajarib kelgan Bahromjon Haydarov lavozimiga rasman tasdiqlandi.
Bahromjon Haydarov joriy yil 26-avgust kuni Dilmurod Rahmatullayev o‘rniga shahar hokimi vazifasini vaqtincha bajaruvchi etib tayinlangandi.
Dilmurod Rahmatullayev ijtimoiy tarmoqlarda behayo suratlar tarqalganidan so‘ng ishdan ketgandi. U 2016-yildan buyon Andijon shahriga hokimlik qilib kelgan.
Andijon viloyati hokimi Shuhratbek Abdurahmonov sobiq hokim Dilmurod Rahmatullayev ishiga salbiy baho berib, uni ko‘p marotaba ogohlantirganini alohida ta’kidlagan. Keyinchalik u 30 ga yaqin holatda qonun talablariga zid hujjatlarni imzolagani aniqlangan.
Bahromjon Haydarov 1972-yilda tug‘ilgan, ma’lumoti bo‘yicha mutaxassisligi iqtisodchi, moliyachi. 1995-yilda Andijon iqtisodiyot va boshqaruv instituti hamda 1998-yilda Bank-moliya akademiyasini tamomlagan. Hokim etib tayinlanishidan avval viloyat moliya bosh boshqarmasi boshlig‘i vazifasida faoliyat ko‘rsatgan. Oilali, uch farzandning otasi.
