Germaniyalik futbolchi mashg‘ulotlar vaqtida vafot etdi

Germaniyaning “Dessauer-97” klubi (mamlakat chempionatining 6-divizion vakili) 30 yoshli yarim himoyachisi Shtefan Haberman 16-iyul, seshanba kuni mashg‘ulotlar vaqtida olamdan o‘tdi. Bu haqda klubning rasmiy saytida xabar berildi.

O‘lim holati sabablari ochiqlanganicha yo‘q. Faqatgina o‘yinchining mashg‘ulotlar vaqtida ahvoli yomonlashgani haqida ma’lumot bor.

“Juda ham og‘ir judolik. So‘z bilan ta’riflab bo‘lmaydi. Shtefanning oila a’zolariga hamda yaqinlariga o‘zimizning chuqur hamdardligimizni izhor etamiz. Biz uni ham inson sifatida, ham futbolchi sifatida uzoq yillar yodda saqlaymiz.

Biz har doim sen haqingda faqat yaxshi narsalarni eslab qolamiz”, — deyiladi klub matbuot xizmati bergan xabarda.

Ma’lumot uchun, Haberman 2010-yildan buyon “Dessauer” sharafini himoya qilib kelayotgandi. Shu vaqtga qadar u klub safida 253 ta uchrashuvda maydonga tushib, 21 ta gol urishga muvaffaq bo‘lgandi.