Qashqadaryolik fuqaroning rafiqasi uchun Rossiyadan sovg‘a sifatida jo‘natgan telefonida pornografik tasvirlar aniqlandi

Rossiya Federatsiyasidan Moskva — Qarshi yo‘nalishidagi 995-sonli aviareys bilan Qarshi xalqaro aeroportiga kelgan Nishon tumanida yashovchi fuqaro Ergash Haqberdiyevning Samsung J1 markali telefoni xotirasida mamlakatga olib kirish taqiqlangan 50 ta pornografik mazmundagi videolavha borligi aniqlandi. Bu haqda Qashqadaryo viloyati bojxona boshqarmasi Axborot xizmatiga tayanib, “Uz24” xabar berdi.

Surishtiruv paytida Ergash Haqberdiyev bu telefonni unga o‘zi bilan birga ishlagan Otabek ismli tanishi xotiniga sovg‘a sifatida berib yuborganini, uning xotirasida nima bor-yo‘qligi bilan qiziqmaganini ma’lum qildi.

“Agar bu bir bahona bo‘lsa, u telefonni axloqsiz tasvirlardan tozalashi, agar chindan ham birovniki bo‘lsa, tegishli nazoratdan o‘tishini hisobga olib, telefondagi materiallar haqida zarur ma’lumotlarni bilib olishi darkor edi”, — deyiladi Qashqadaryo viloyati bojxona boshqarmasi xabarida.

Yakunda mazkur huquqbuzarlik holati uchun jinoyat ishlari bo‘yicha Qarshi shahar sudining qarori bilan Ergash Haqberdiyevga nisbatan 748 875 so‘m miqdorida jarima jazosi tayinlandi. Huquqbuzarlik ashyosi hisoblangan Samsung J1 markali qo‘l telefoni pornografik tasvirlardan tozalanib, musodara qilindi.