Qirg‘iziston MSK: prezidentlikka nomzodlarni ko‘rsatish jarayoni 1-avgustga qadar davom etadi

Qirg‘iziston prezidentligiga nomzodlarni ko‘rsatish jarayoni joriy yilning 1-avgustiga qadar davom etadi. Bu haqda respublikada saylovlar va referendumlar o‘tkazish bo‘yicha Markaziy saylov komissiyaning axborot bo‘limi “TASS”ga ma’lum qildi.

“Nomzodlarni ko‘rsatish jarayoni 1-avgustda yakunlanadi, shundan so‘ng ular tomonidan taqdim etilgan hujjatlar 10-avgustga qadar tekshiriladi”, — deyiladi bayonotda. Axborot bo‘limi xodimining so‘zlariga ko‘ra, hujjatlar tekshiruvi tugagach nomzodlarni ro‘yxatga olish jarayoni boshlanadi. “Ular qirg‘iz tilidagi bilimini tekshiruvchi test sinovini topshirishlari, 1 million som (15 ming dollar atrofida) saylov badalini to‘lashlari hamda o‘zini qo‘llab-quvvatlovchi kamida 30 ming saylovchining imzosini to‘plashi kerak”, — deb keltiradi MSK.

Komissiya ma’lumotlariga ko‘ra, ayni vaqtga qadar 30 kishi o‘z nomzodini olg‘a surgan. “Ulardan besh nafar siyosiy partiyalarning qurultoyida olg‘a surilgan bo‘lsa, qolganlari o‘z nomzodini o‘zlari olg‘a surgan”, — deyiladi Markaziy saylov komissiyasida. Nomzodlar orasida amaldagi bosh vazir Sooronbay Jeenbekov, hukumatning sobiq rahbarlari Temir Sariyev va Omurbek Babanov, shuningdek, muxolifat parlament fraksiyasi yetakchisi Bakit Torobayevning ismlarini ko‘rish mumkin.

Qirg‘izistonda 2011-yilda bo‘lib o‘tgan prezidentlik saylovlarida Markaziy saylov komissiyasiga 80 nafardan ortiq odam o‘z nomzodini ilgari surgan, biroq ularning beshdan birigina ro‘yxatdan o‘tgan.

Qirg‘iziston prezidentiligiga saylov jarayoni joriy yilning 15-oktabrida bo‘lib o‘tadi. Amaldagi prezident Almazbek Atambayev saylovda ishtirok etmaydi, chunki mamlakat qonunchiligi olti yillik muddatga bir martadan ortiq saylanishga ruxsat bermaydi.