Tesha Mo‘minov vazir Bahodir Ahmedovdan teatrda fidokorona ishlayotganlarni mehnatiga yarasha rag‘batlantirishni so‘radi
18-yanvar kuni Madaniyat va sport ishlari vaziri Bahodir Ahmedov shaxsiy va jamoaviy masalalar bilan murojaat etgan bir necha fuqaroni qabul qildi. Bu haqda O‘zbekiston Respublikasi Madaniyat va sport ishlari vazirligi matbuot xizmati xabar bermoqda.
Dastlabki muloqot Erkin Komilov, Shuhrat Rizayev va Olimjon Salimov bilan bo‘ldi.
Teatrda takrorlanmas obrazlarni yaratib, teatr va kino san’ati muxlislari mehrini qozongan, O‘zbekiston Milliy akademik drama teatri aktyori, O‘zbekiston xalq artisti Erkin Komilov, o‘zbek adabiyoti, teatr va kino san’ati masalalariga doir ko‘plab monografiya, risola va ilmiy maqolalar chop etgan adabiyotshunos olim Shuhrat Rizayev, O‘zbekiston Milliy akademiya drama teatrining rejissori Olimjon Salimov respublika teatrlarida mumtoz asarlarga ko‘proq e’tibor qaratish, ijro etilayotgan va rejalashtirilayotgan tarixiy mavzudagi asarlarni yanada takomillashtirish taklifini ilgari surdi.
Vazir murojaatchilarning talab va takliflarini qabul qilar ekan, inobatga olishini, rejalarning ijobati uchun barcha birdek mehnat qilishini ta’kidladi.
O‘zbekiston xalq artisti Tesha Mo‘minov vazir bilan uchrashuvda nafaqat o‘z ijodiy faoliyati, balki teatrlarda turli-tuman rollar ijro etayotgan g‘ayratli yoshlar, tajribali ustozlar haqida so‘z yuritdi. O‘z o‘rnida teatr sohasida amalga oshirilayotgan ijobiy o‘zgarishlarga havas qilgan holda shu yo‘lda fidokorona ish olib borayotganlarning mehnatiga yarasha rag‘batlantirish maqsadga muvofiq bo‘lish takliflarini bayon etdi. Bunga javoban vazir hech kimning mehnati rag‘batsiz qolmasligi va bu takliflar ham inobatga olinishini ta’kidladi.
Fuqaro Murodjon Sagdiyev ancha yildan buyon sport sohasida ishlagan. Uning ish so‘rab qilgan murojaati bo‘yicha vazir tegishli boshqarma boshlig‘iga topshiriqlar berdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
