Yangi yil kuni marhum xonanda Shahnozabonu ijrosidagi yakuniga yetmay qolgan so‘nggi qo‘shiq premyera qilinadi

Marhum xonanda Shahnozabonu tomonidan kuylangan, biroq yakuniga yetmay qolgan “Alda” nomli qo‘shiq ertaga — 31-dekabr kuni premyera qilinadi. Bu haqda qo‘shiqchining qizi Umidabonu Yo‘ldosheva Instagram sahifasi orqali ma’lum qildi.

Qo‘shiq oxiriga yetmay qolgan bo‘lsa-da, uning ustida ish olib borgan Bahodir Nizomov va Umid Obidov hamkorlikda mehnat qilib, uni tayyor ko‘rinishga keltirib, sayqallagan.

“O‘zim ham kecha bildim. Umid va Bahodir akalarim menga syurpriz qilib, “Alda” nomli qo‘shiqni oxiriga yetkazishibdi. Premyera qaysi radioda bo‘lishini hali aytishmadi. Onajonimning ijodkor do‘stlari tomonidan tayyorlangan qo‘shiqni 31-dekabr kuni eshitamiz”, — deb yozgan Umidabonu Yo‘ldosheva Instagram sahifasiga.

Ma’lumot uchun, xonanda Shahnozabonu 2016-yilning 14-mart kuni 42 yoshida vafot etgandi.