13-oktabr kuni Bahraynda futbol bo‘yicha yoshlar o‘rtasidagi Osiyo Chempionati start olib, “A” guruhidagi ikki bellashuv o‘tkazildi.
Birinchi bo‘lib maydonga Janubiy Koreya va Tailand terma jamoalari chiqib keldi. Bellashuv koreyalik futbolchilarning 3:1 hisobidagi g‘alabasi bilan yakuniga yetdi.
Turnirning ikkinchi o‘yinida Bahrayn yoshlari Saudiya Arabistoni termasini 3:2 hisobida taslim qildi. Bellashuvda 2 ta gol farqi bilan oldinda borayotgan mezbonlar, keyinroq ikkita gol o‘tkazib yuborgandi. Hakam tomonidan qo‘shib berilgan daqiqaning to‘rtinchisiga kelib Bahrayn durangdan qutulib qoldi.
Osiyo Chempionatida O‘zbekiston yoshlar terma jamoasi “D” guruhidan joy olgan bo‘lib, Jasur Abduraimov boshchiligidagi jamoa o‘zining ilk uchrashuvini 15-oktabr kuni Tojikistonga qarshi o‘tkazadi. Guruhda, shuningdek, Xitoy va Avstraliya termalari bor.
Yoshlar o‘rtasidagi Osiyo Chempionatida yarim finalga qadar yetib borgan mamlakat vakillari 2017-yil Janubiy Koreya mezbonlik qiladigan mundialda ishtirok etadi. Bordi-yu, Janubiy Koreya termasi qit’a birinchiligining yarim finaliga qadar yetib kelsa, u holda to‘rtinchi yo‘llanma uchun chorak finalda mag‘lub bo‘lgan termalar kurashga kirishadi.
Izoh (0)