Istanbulning Otaturk aeroportida 28-iyun kuni oqshomda yuz bergan terrorchilik harakatlari chet elliklar tomonidan amalga oshirilgani taxmin qilinmoqda. Bu haqda CNN Turk telekanaliga tayanib, “RBK” xabar bermoqda.
Telekanalning aniqlashicha, portlash yuzasidan surishtiruv ishlarini Turkiya prokuraturasining terrorizm va uyushgan jinoyatchilik byurosi olib bormoqda. Xususan, ular aeroportga hujum uyushtirganlar jasadining ekspertizasini olib bormoqda.
Cumhuriyet nashrining yozishicha, teraktni chet ellik terrorchilar amalga oshirgan bo‘lishi mumkin.Turkiya bosh vaziri Binali Yildirimning ma’lum qilishicha, uch nafar xudkush terrorchi aeroportga taksida kelib, odamlarga qarata o‘q uzgan va o‘zini-o‘zi portlatib yuborgan. Mamlakat hukumati bu ishlarning ortida IShID terrorchilik guruhi turganini taxmin qilmoqda.
Eslatib o‘tamiz, Turkiyaning Istanbul shahridagi Otaturk nomli xalqaro aeroportda sodir etilgan terakt oqibatida hayotdan ko‘z yumganlar soni 43 nafarga yetgani hamda ular orasida O‘zbekiston fuqarosi borligi haqida xabar berilgandi. Jarohatlanganlar soni 147 kishini tashkil qilmoqda. O‘zbekiston prezidenti Islom Karimov teraktlar munosabati bilan Turkiya prezidenti Rajab Toyyib Erdo‘g‘onga hamdardlik bildirdi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)