“Lester” klubi yarim himoyachisi Riyad Mahrez professional futbolchilar uyushmasi (PFA) tomonidan Angliya Premyer-ligasi 2015/16-yilgi mavsumining eng yaxshi futbolchisi deb topildi. Bu haqda “Chempionat” xabar bermoqda.
Mavsumning eng yaxshi futbolchisi nomiga, shuningdek, Harri Keyn (“Tottenhem”), Mesut O‘zil (“Arsenal”), Dimitri Paye (“Vest Hem”), Jeymi Vardi va Ngolo Kante (ikkalasi “Lester”) da’vogarlik qilgan edi.
Joriy mavsumda 25 yoshli jazoirlik futbolchi Angliya chempionatining 34 o‘yinida 17 ta gol kiritib, 11 ta golli uzatmaga mualliflik qildi.
Mavsumning eng yaxshi yosh futbolchisi nomiga “Tottenhem” yarim himoyachisi Dele Alli sazovor bo‘ldi. 20 yoshli futbolchi Premyer-liganing 32 o‘yinida maydonga tushib, 10 ta gol va 9 ta golli uzatmani o‘z hisobiga yozib qo‘ydi.
Professional futbolchilar uyushmasi, shuningdek, 2015/16-yilgi mavsumning ramziy terma jamoasini e’lon qildi. Ramziy termadan quyidagi futbolchilar joy oldi.
Darvozabon: David De Xea (“Manchester Yunayted”).
Himoyachilar: Denni Rouz (“Tottenhem”), Tobi Alderveyreld (“Tottenhem”), Ues Morgan (“Lester”), Ektor Belyerin (“Arsenal”).
Yarim himoyachilar: Dimitri Paye (“Vest Hem”), Ngolo Kante (“Lester”), Dele Alli (“Tottenhem”), Riyad Mahrez (“Lester”).
Hujumchilar: Harri Keyn (“Tottenhem”), Jeymi Vardi (“Lester”).
Izoh (0)