Ekspertlar Rostov-Dondagi Boeing halokatining ehtimoliy sabablarini ma’lum qildi

Rostov-Donda halokat va 62 kishining o‘limi bilan yakunlangan Boeing 737-800 samolyotining qo‘ndirilishi murakkab ob-havo sharoitida amalga oshirildi. Aviatsiya ekspertlari sharoitlar va ekipaj xatti-harakatlariga dastlabki bahoni berdi, deb yozadi “RBK”.

“Parvozlar xavfsizligi” konsultatsiya-tahliliy agentligi bosh direktori Sergey Melnichenko samolyotni qo‘ndirishga bo‘lgan birinchi va ikkinchi urinishlar o‘rtasida samolyot ikki soatcha havoda bo‘lib turganining ehtimoliy sabablarini tushuntirdi.

“Uchuvchilar ob-havo sharoiti yaxshilanishini kutgan bo‘lishi mumkin. Ehtimol qaysidir lahzada ob-havo yaxshilangan va ular shundan foydalanib qolmoqchi bo‘lgan. Biroq soniyasiga 22 metr tezlikda juda kuchli shamol bo‘lgan, samolyotning esa uchdan bir qismigina to‘la bo‘lgan. Kuchli shamol esayotgan vaqtda yarmi bo‘sh samolyotni boshqarish qiyinroq”, — deya aniqlik kiritdi Melnichenko.

“Hozir barcha mutaxassislar samolyotning eson-omon qo‘nishiga noqulay ob-havo sharoiti xalal bergani haqidagi fikrga qo‘shilmoqda. Bizning ma’lumotlarga ko‘ra, samolyotni qo‘ndirish uchun birinchi urinish 17 m/soniya tezlikda shamol esayotgan vaqtda amalga oshirilgan, ikkinchisi esa bundan ham kuchliroq shamol vaqtida bo‘lgan. Boshqa aeroportlarda sharoitlar qulayroq bo‘lgan, ekipajda esa birorta zaxira aerodromiga borish yoki yana biroz kutish uchun yetarlicha yoqilg‘i bo‘lgan. Samolyot qulagan vaqtda unda yana ikki soatlik parvozga yetadigan yoqilg‘i bor edi”, — deya qo‘shimcha qildi ekspert.

• Rostov-Donda qulagan “Boing”