Qozog‘iston Milliy matbuot klubi rahbari 1 mln dollarni o‘zlashtirishda ayblanib, qo‘lga olindi
Qozog‘iston Milliy matbuot klubi prezidenti Seytqazi Matayev katta miqdordagi pul mablag‘larini o‘zlashtirishda ayblanib, qo‘lga olindi. Bu haqda davlat xizmati masalalari vazirligi qoshidagi Korrupsiyaga qarshi kurash milliy byurosi axborotiga tayangan holda “TASS” xabar bermoqda.
Aytilishicha, Matayev 1 million dollarga yaqin miqdordagi pullarni o‘zlashtirishda, shuningdek, soliq to‘lashdan bo‘yin tovlaganlikda ayblanmoqda.
Davlat budjetidan “Kazaxtelekom” milliy kompaniyasi hamda axborotlashtirish qo‘mitasiga axborot siyosatini yuritish uchun mablag‘ ajratilgan bo‘lib, ular Milliy matbuot klubi va “KazTAG” axborot agentligi bilan shartnoma imzolagan. Axborotlashtirish qo‘mitasi hisobiga o‘tkazilgan 80 million tenge (222 ming dollar) va “Kazaxtelekom” hisobiga o‘tkazilgan 260 million tenge (722 ming dollar) Matayev tomonidan o‘zlashtirilgan.
Bundan tashqari, u 327 million tenge (908 ming dollar) miqdorida soliq to‘lashdan yashiringanlikda ayblanmoqda.
“Adil so‘z” xalqaro so‘z erkinligini himoya qilish jamg‘armasining ma’lumotlariga qaraganda, mazkur ish bo‘yicha gumondorlardan biri sanalgan “KazTAG” direktori Aset Matayev ham hibsga olingan.
