Simferopol sudi Qrim tatarlari yetakchisini sirtdan hibsga oldi

Simferopol tuman sudi Qrim tatarlari yetakchisi Mustafo Jemilevni sirtdan hibsga olish va federal qidiruv e’lon qilish haqida qaror qabul qildi. Bu haqda uning advokati Jemil Temishevning ma’lumotiga tayanib, Meduza xabar beradi.

Temishevning so‘zlariga qaraganda, Jemilev Rossiya qonunchiligining uchta moddasini buzishda gumon qilinmoqda. Qrim tatarlari majlisining sobiq rahbarini hibsga olish haqidagi iltimosnoma bilan Federal xavfsizlik xizmati tergovchisi murojaat qilgan.

Uning aynan qaysi moddalarni buzganligi aniqlashtirilmagan.

Mustafo Jemilev Qrimning Rossiya tarkibiga qo‘shilishiga qarshi chiqqan edi va hozirgi paytda Ukraina hududida istiqomat qilib kelmoqda.