Al-Haram masjidiga kran qulashi oqibatida halok bo‘lganlarning barchasi Makkada nomsiz qabrlarga dafn etiladi

Makkadagi Al-Haram masjidi ustiga kran qulashi natijasida halok bo‘lgan ziyoratchilar vataniga qaytarilmaydi, ular qisqa muddat ichida Makka qabristonidagi nomsiz qabrlarga dafn etiladi. Bu haqda “Segodnya.ua” xabar bermoqda.

So‘nggi ma’lumotlarga ko‘ra, fojea oqibatida 107 kishi halok bo‘lgan, 238 kishi tan jarohati olgan. Xabar berishlaricha, qurbonlar va jabrlanuvchilar orasida o‘zbekistonlik ziyoratchilar yo‘q.

Eslatib o‘tamiz, 11-sentabr kuni juma namozi vaqtida Makkadagi Al-Haram masjidi ustiga minora krani quladi. Dastlabki ma’lumotlarga ko‘ra, fojeaga kuchli yog‘ingarchilik va shamol sabab bo‘lgan.

Mahalliy ma’muriyat hodisaning barcha tafsilotlarini o‘rganib chiqadigan maxsus komissiya tashkil etgan. Hodisa joyida qutqaruvchilar va shifokorlar ish olib bormoqda, shaharning barcha shoshilinch xizmatlari favqulodda ish tartibiga o‘tkazilgan.