Baltimor shahri ma’muriyati qo‘lga olish chog‘ida halok bo‘lgan Greyning oilasiga 6,4 mln dollar to‘lashga qaror qildi

Baltimor shahri ma’muriyati (AQSh, Merilend shtati) 9-sentabr, chorshanba kuni o‘limida mahalliy politsiya xodimlari gumon qilinayotgan 25 yoshli qora tanli Freddi Greyning oilasiga 6,4 million dollar tovon to‘lanishini tasdiqladi. Ma’muriyat vakillari va halok bo‘lgan yigitning qarindoshlari sudga qadar muzokara jarayonida shunday kelishuvga erishgan. Bu haqda “TASS” xabar bermoqda.

Shahar uchun bu to‘lov anchayin yirik hisoblanadi, chunki 2011-yildan 2014-yilgacha politsiyaning noqonuniy harakatlari yuzasidan o‘tkazilgan 102 ta sud muhokamasi natijasida atigi 5,7 million dollar to‘lab berilgan edi.

Eslatib o‘tamiz, 12-aprelda politsiyachilar Freddi Greyni qo‘lga olish chog‘ida bo‘ynini deyarli sindirib qo‘ygan va u bir haftadan so‘ng o‘ziga kelmay olamdan o‘tgan edi. Shundan so‘ng Baltimorda ommaviy tartibsizliklar boshlanib, favqulodda holat joriy etildi, shaharga hatto Milliy gvardiya qismlari ham kiritildi.

Mahalliy sud o‘tgan haftada Greyning o‘limida gumon qilinayotgan olti nafar politsiyachining ishini har birini alohida ko‘rib chiqishga qaror qildi.