O‘zbekiston Respublikasi davlat mustaqilligining 24 yilligiga bag‘ishlab “Biz – buyuk yurt farzandlarimiz!” shiori ostida o‘tkazilgan festivalda farg‘onalik yoshlarga Prezidentimiz sovg‘asi – ikkita Isuzu avtobusi topshirildi, deb xabar bermoqda O‘zA.
“Kamolot” yoshlar ijtimoiy harakati markaziy kengashi va viloyat hokimligi hamkorligida tashkil etilgan festival doirasidagi tadbirlarda senatorlar, deputatlar, olim va ijodkorlar, san’atkorlar hamda yoshlar ishtirok etdi.
“Biz – buyuk yurt farzandlarimiz!” shiori ostida o‘tkazilgan festival barcha shahar va tumanlarda yoshlarning katta shodiyonasiga aylandi. Festival doirasida maktablar, kollej va litseylarda, Mehribonlik uylarida “Hech kim mehr va e’tibordan chetda qolmasin!”, “Siz sevgan qahramonlar”, “Ommaviy madaniyat va yoshlar ma’naviyati”, “Deputat va yoshlar”, “Hokim va yoshlar”, “Zamonamiz qahramonlari” mavzularida taniqli shoir va yozuvchilar, kino va teatr aktyorlari bilan uchrashuvlar, kitobxonlikni keng targ‘ib qilishga qaratilgan loyihalar, sport musobaqalari tashkil etildi. “Kamolot” kutubxonasi”, “Prezidentimiz asarlari bilimdoni” loyihalari esa yoshlarning yanada yagona maqsad sari birlashishida muhim ahamiyat kasb etdi.
– Mamlakatimizda yosh avlod kamoloti yo‘lida amalga oshirilayotgan keng ko‘lamli ishlar, yoshlarga qaratilayotgan ulkan e’tibor va g‘amxo‘rlik zamirida buyuk davlat barpo etishdek olijanob maqsad mujassam, – deydi O‘zbekiston Respublikasida xizmat ko‘rsatgan artist Mirza Azizov. – Mana bunday tadbirlar kelajagimiz egalarini Vatanga muhabbat, istiqlol g‘oyalariga sadoqat, milliy qadriyatlarimizga hurmat ruhida tarbiyalash, ularni turli ma’naviy tahdidlardan asrashda muhim ahamiyat kasb etadi. Mamlakatimizning barcha hududlarida barpo etilayotgan zamonaviy ta’lim muassasalari, muhtasham sport va musiqa inshootlari yoshlarning hech kimdan kam bo‘lmasdan voyaga yetishiga xizmat qilmoqda.
– Festivalda tengdoshlarimiz bilan faol ishtirok etdik, – deydi Farg‘ona davlat universiteti talabasi Gulchehra Jiyanova. – Ommaviy tahdidlar va yoshlar ma’naviyati, odam savdosi va uning salbiy oqibatlari, axborot xurujlari va ulardan himoyalanishga oid dolzarb mavzulardagi muloqotlar huquqiy bilim va dunyoqarashimizni yanada mustahkamlashga yordam berdi.
Taniqli san’atkorlar va yosh ijrochilar ishtirokidagi gala-konsert barchaga ko‘tarinki kayfiyat bag‘ishladi. Festival doirasida farg‘onalik yoshlarga Prezidentimiz sovg‘asi – ikkita Isuzu avtobusi topshirildi.
“Eng yaxshi huquq targ‘ibotchisi”, “Eng yaxshi ma’naviyat targ‘ibotchisi” hamda “Eng yaxshi sog‘lom turmush tarzi targ‘ibotchisi” nominatsiyalarida g‘oliblar aniqlanib, tashkilotchilar tomonidan rag‘batlantirildi.
Tadbirda Farg‘ona viloyati hokimi Sh.G‘aniyev so‘zga chiqdi.
Izoh (0)