Qozog‘istondagi jahon chempionatida ishtirok etgan o‘zbekistonlik og‘ir atletikachilar Toshkentga qaytib keldi
Qozog‘istonning Olma-Ota shahrida og‘ir atletika bo‘yicha jahon chempionati bo‘lib o‘tdi. Dunyoning 60 dan ziyod mamlakati atletlari qatnashgan yilning so‘nggi nufuzli musobaqasida O‘zbekiston terma jamoasi a’zolari ham munosib tarzda ishtirok etdi, deb xabar bermoqda “Olamsport”.
Xabar berilganidek, O‘zbekiston terma jamoasiga ilk medalni 85 kilogramm vazn toifasida supachaga chiqqan Ulug‘bek Alimov keltirdi. U kumush medalga sazovor bo‘ldi. 105 kg vazn toifasidagi dunyoning eng kuchli polvonlaridan biri Ruslan Nuriddinov esa bittadan oltin, kumush hamda bronza medalini qo‘lga kiritdi.
Kecha, 17-noyabr kuni kechqurun O‘zbekiston terma jamoasi delegatsiyasi Toshkentga qaytib keldi. O‘zbekiston sportchilarini poytaxt xalqaro aeroportida keng sport jamoatchiligi kutib oldi.
