Xivadagi Olloqulixon madrasasida hunarmandchilik markazi ishga tushdi

Xivada bugungi kunda 130 dan ziyod me’moriy yodgorlik saqlanib qolgan. Shulardan biri Olloqulixon madrasasi qayta ta’mirlandi va unda an’anaviy hunarmandchilik markazi ish boshladi. Bu O‘zbekiston Respublikasi Tashqi ishlar hamda Madaniyat va sport ishlari vazirliklari tashabbusi bilan yaponiyalik mutaxassislar hamkorligida amalga oshirildi, deb xabar bermoqda “Turkiston press”.

Shuningdek, YuNESKOning O‘zbekistondagi vakolatxonasi bilan hamkorlikda Yoqubboy xo‘ja, Abdurasulboy madrasalarida ipak gilamlar va so‘zanalar to‘qish markazlari ochildi.

Bundan tashqari, Yaponiyaning Kioto universiteti olimlari muzeylar fondida saqlanayotgan xatlar, buyumlar katalogini nashrga tayyorlash, respublika yosh olimlari milliy jamiyati bilan hamkorlikda hujjatlarning elektron variantini yaratish ustida ish olib bormoqda.

Yaqinda esa Xitoy madaniy meros akademiyasining bir guruh xodimlari Xivaga tashrif buyurib, qadimiy shahardagi tarixiy va madaniy yodgorliklar bilan tanishdi. Tashrif doirasida yodgorliklarni ta’mirlash va asrash bo‘yicha grant loyihasini amalga oshirish yuzasidan o‘zaro kelishuvga erishildi.

Tez orada bu yerda xitoylik hamkorlar bilan tarixiy obidalarni ta’mirlash, asl holiga keltirish ishlari boshlab yuboriladi.