O‘zbekistonning birinchi raqamli tennischisi Denis Istomin Germaniyaning Dyusseldorf shahrida davom etayotgan turnirning yarim finaliga chiqdi. Bu haqda “Olamsport” xabar berdi.
Denis turnirning chorak finalida musobaqaning uchinchi raketkasi Andreas Seppini mag‘lub etdi.
Seppi ATP reytingida 33-o‘rinni band etib turibdi. Denis esa 57-pog‘onadan joy olgan. Dastlabki setda ketma-ket to‘rtta geymni yutib olgan Istomin yakunda 6:3 hisobida zafar quchdi. Denis ikkinchi set avvalida ham raqibining geymida g‘alaba qozondi va bu ustunlikni uchrashuv so‘ngiga qadar saqlab qoldi – 6:4.
Denis yarim finalda turnirning birinchi raketkasi, germaniyalik Filipp Kolshrayber hamda Mate Delich (Xorvatiya) uchrashuvi g‘olibi bilan to‘qnash keladi.
Eslatib o‘tamiz, Dyusseldorf turnirining mukofot jamg‘armasi 485 ming 760 yevroni tashkil etadi. G‘olib tennischi 77 ming 315 yevro hamda 250 reyting ochkosiga ega bo‘ladi. Denis yarim finalga chiqqani uchun 22 ming 60 yevro hamda 90 reyting ochkosiga ega bo‘lib ulgurdi.