Toshkentdagi “O‘zekspomarkaz”da bo‘lib o‘tayotgan kommunal, transport, kapital qurilish sohalari va qurilish industriyasi korxonalarining tarmoq sanoat yarmarka va kooperatsiya birjasida ishlab chiqarishni modernizatsiya qilish, mahalliylashtirish va kooperatsiya aloqalarini kengaytirish jarayonlari namoyish etilmoqda, deb xabar beradi O‘zA.
Sanoat yarmarkasi va kooperatsiya birjasi ekspozitsiyasi majmuaning 170 dan ortiq yetakchi korxonasi, kichik biznes va xususiy tadbirkorlik vakillarining mahsulot va xizmatlaridan iborat. Ular orasida “O‘zbekiston havo yo‘llari” milliy aviakompaniyasi, “O‘zbekiston temir yo‘llari” davlat aksiyadorlik kompaniyasi, “O‘zavtoyo‘l” davlat aksiyadorlik kompaniyasi, “O‘zmontajmaxsusqurilish” uyushmasi, “Toshshahartransxizmat” aksiyadorlik kompaniyasi, “O‘zqurilishmateriallari” aksiyadorlik kompaniyasi, “O‘zkommunxizmat” agentligi korxonalari, boshqa kompaniyalar, shuningdek, ko‘plab kichik biznes va xususiy tadbirkorlik subyektlari bor. Ularning stendlarida ishlab chiqarilayotgan eksportbop tovarlar, shuningdek, istiqbolda mahalliylashtirish va kooperatsiya aloqalarini kengaytirish asosida ishlab chiqariladigan mahsulotlar bilan tanishish mumkin.
“O‘zkommunxizmat” agentligi xorijiy sheriklar bilan hamkorlikda oqova suvlarni tozalash va nasos yordamida tortib chiqarishning yangi texnologiyasini taqdim etmoqda. Yarmarkada taklif etilayotgan suv filtrlari – qum, neft va yog‘ tutqichlar, biologik tozalash tizimlari soatiga 6 ming litrgacha oqova suvni samarali tozalash imkonini beradi. Shuningdek, oqova suvni tortib chiqarish uchun modernizatsiya qilingan kanalizatsiya nasos stansiyalari ham taklif qilinmoqda. Eng muhimi, ushbu texnologiyalar qishloq joylarda, jumladan, Toshkent viloyatida namunali loyihalar asosida uy-joylar qurilishida muvaffaqiyatli qo‘llanilmoqda.
Mamlakatda 130 dan ortiq bo‘limlariga ega bo‘lgan “O‘zmontajmaxsusqurilish” uyushmasi ushbu sanoat yarmarkasida har yili faol ishtirok etib kelmoqda. 2013-yil yakunlariga ko‘ra, uyushma tomonidan qiymati 76,9 milliard so‘mlik qurilish-montaj ishlari amalga oshirildi, 385 milliard so‘mlik sanoat mahsulotlari va 478 milliard so‘mdan ziyod mahalliylashtirilgan mahsulotlar ishlab chiqarildi. Ishlab chiqarishni modernizatsiya qilish va mahalliylashtirish, texnik va texnologik qayta jihozlash dasturlarining amalga oshirilishini jadallashtirish, xalqaro sifat standartlariga o‘tish evaziga shunday natijalarga erishildi.
Transport tarmog‘i, jumladan, “O‘zbekiston havo yo‘llari” milliy aviakompaniyasining ulkan stendlari yarmarka ishtirokchilari va mehmonlar e’tiborini tortmoqda. Bugungi kunda “O‘zbekiston havo yo‘llari” Osiyo, Amerika va Yevropaning 40 dan ortiq shaharlariga parvozlarni amalga oshirmoqda. Birgina 2013-yilda aviakompaniya tomonidan 24,5 mingdan ziyod reys amalga oshirilib, 2,6 million nafardan ortiq yo‘lovchi va 41 ming tonna yuk tashildi.
Uning “SAR” maxsus ishlar sho‘ba aviakompaniyasi qishloq xo‘jaligi va transport sohalarida o‘z xizmatini taklif qilmoqda. Kichik hajmdagi samolyotlar, shuningdek, vertolyotlarning katta parkiga ega bo‘lgan ushbu muassasa qishloq xo‘jaligi zararkunandalariga aviatsiya yordamida qarshi kurashish, havodan suratga olish ishlari bilan shug‘ullanmoqda, narkojinoyatchilikka qarshi kurash, baland tog‘larda qor qoplamlarini kuzatish, meteostansiyalar xodimlari xavfsizligini ta’minlashga jalb etilmoqda, shuningdek, tog‘ chang‘isi bilan shug‘ullanadigan sayyohlarga xizmat ko‘rsatmoqda. Uzbekistan airways technics aviata’mirlash korxonasi zamonaviy samolyotlarga texnik xizmat ko‘rsatish va ta’mirlash bo‘yicha keng ko‘lamli xizmatlarni taqdim etmoqda.
Kommunal, transport, kapital qurilish sohalari va qurilish industriyasi korxonalarining tarmoq sanoat yarmarka va kooperatsiya birjasi 22-mayga qadar davom etadi.
Izoh (0)