“O‘zekspomarkaz”da “O‘zbekiston neft va gazi – OGU—2014” 18-xalqaro ko‘rgazmasi va Energetika – Power Uzbekistan—2014 9-xalqaro ixtisoslashtirilgan ko‘rgazmasi ochildi, deb xabar beradi O‘zA.
Ko‘rgazmalar “O‘zbekneftgaz” milliy xolding kompaniyasi, O‘zbekiston Respublikasi Tashqi iqtisodiy aloqalar, investitsiyalar va savdo vazirligi, “O‘zbekenergo” davlat aksiyadorlik kompaniyasi, Savdo-sanoat palatasi, ITE Uzbekistan xalqaro ko‘rgazmalar kompaniyasi tomonidan ITE kompaniyalari guruhi bilan hamkorlikda tashkil etildi.
Ekspozitsiyada Xitoy, Janubiy Koreya, AQSh, Fransiya, Buyuk Britaniya, Germaniya, Vengriya, Vyetnam, Polsha, Italiya, Rossiya, Ruminiya, Daniya, Qozog‘iston, Turkiya kabi 20 davlatdan 160 dan ortiq kompaniya o‘z mahsulotlarini namoyish etmoqda.
“OGU—2014” ko‘rgazmasida “O‘zneftmahsulot”, “O‘zneftgazqurilishinvest”, “O‘zneftgazmash” aksiyadorlik kompaniyalari, Muborak gazni qayta ishlash zavodi, “Sho‘rtan gaz-kimyo kompleksi” unitar sho‘ba korxonasi va boshqa kompaniyalar uglevodorodlarni qidirish, qazib olish, burg‘ulash, tog‘-kon sanoati, isitish, payvandlash jihozlari, avtomobillarga gaz to‘ldirish kompressor stansiyalari va yoqilg‘i quyish shoxobchalari uchun qurilmalar, sintetik suyuq yoqilg‘i ishlab chiqarish bo‘yicha eng yaxshi takliflar taqdim etgan.
Xitoy va Janubiy Koreya kompaniyalari ham kengaytirilgan tarkibda qatnashmoqda. Jumladan, Janubiy Koreyaning Kwang Shin kompaniyasi havo va gaz kompressorlari, avtomobillarga gaz to‘ldirish kompressor stansiyalari asbob-uskunalarini taqdim etmoqda. Xitoyning Shanghai SK Petroleum Equipment Co. Ltd kompaniyasi keng turdagi burg‘ulash qurilmalari, jumladan, boshqaruv pultlari, geologik analizatorlar, quduq va surma qopqoqlarni nazorat qilish uskunalarini namoyish etayotir.
– Kompaniyamiz o‘zbekistonlik sheriklar bilan 2008-yildan buyon hamkorlik qilib kelmoqda, – deydi Shangdong Kerui Petroleum Eqipment Co, Ltd kompaniyasining mamlakatimizdagi vakolatxonasi bosh direktori Devid Vu (Xitoy). – O‘zbekistonda neft-gaz tarmog‘ining jadal sur’atlar bilan rivojlanib borayotgani o‘zaro manfaatli hamkorlik uchun yangi imkoniyatlar ochmoqda. “OGU—2014” ko‘rgazmasida O‘zbekiston kompaniyalari bilan hamkorlik aloqalarini kengaytirish niyatidamiz.
Germaniyaning Draegerwek AG, Jumo Gmbh&Co. KG, Kanex Krohne Anlagen Export Gmbh va boshqa yirik kompaniyalarining ekspozitsiyalari ham ko‘pchilikning e’tiborini tortmoqda. Ular ishlab chiqarish xavfsizligi va muhofazasini ta’minlash, kontrollerlar, rostlagich va indikatorlar, o‘lchov texnikalari, dizel dvigatellari va turbinalar ishlab chiqarish bo‘yicha o‘z ishlanmalarini namoyish etmoqda.
Italiya, Fransiya, Ruminiya, Polsha va Daniyadan tashrif buyurgan ishtirokchilar stendlarida transport-ekspeditorlik xizmatlari, boshqaruv tizimlari, neft-gaz tarmog‘i uchun texnologik qurilmalar va boshqa uskunalar taqdimotlari o‘tkazilmoqda.
Masalan, Italiyaning SAFE s.p.a kompaniyasi keng turdagi gaz kompressori jihozlari, Ruminiyaning Confind kompaniyasi neft sanoati uchun keng turdagi uskunalar namoyish etmoqda.
Ko‘rgazma doirasida xalqaro ilmiy-texnikaviy konferensiya ham o‘tkaziladi. Unda O‘zbekiston neft-gaz sanoatini rivojlantirish masalalari, muvaffaqiyatli tajriba va xalqaro hamkorlikning yangi imkoniyatlari, mamlakat neft-gaz sanoatidagi loyihalarni moliyalashtirish va boshqa dolzarb mavzular muhokama etiladi.
“O‘zbekiston neft va gazi – OGU—2014” xalqaro ko‘rgazmasi bilan bir maydonda energetika, energiyani tejash, muqobil energiya manbalari sohasidagi eng so‘nggi yutuqlar namoyish etilayotgan Energetika – Power Uzbekistan—2014 xalqaro ko‘rgazmasi ham bo‘lib o‘tmoqda.
Ko‘rgazmada Xitoy, Janubiy Koreya, Germaniya, Fransiya, Rossiya, Turkiya va Qozog‘istondan 50 ga yaqin kompaniya ishtirok etayotir.
Xitoylik ishlab chiqaruvchilarning keng turdagi mahsulotlari ishtirokchilar va mehmonlar e’tiborini o‘ziga jalb etmoqda. Chengdu Andisoon Measure Co. Ltd, Jiangsu Tongguang Optical Cable Co. Ltd, Sanbian Sci-Tech Co. Ltd va boshqa kompaniyalar transformator, generator, elektrodvigatel va boshqa ko‘plab mahsulotlarni namoyish etmoqda. Koreya Respublikasi, Turkiya va Fransiyadan tashrif buyurgan ishlab chiqaruvchilar energetika sohasidagi eng zamonaviy ishlanmalarni taqdim etmoqda.
Xalqaro ko‘rgazma doirasida “Energetika—2014: innovatsiyalar, yechimlar, istiqbollar” mavzusida seminarlar o‘tkaziladi. Ularda energiyadan foydalanish usullarini takomillashtirish, mavjud stansiyalarni modernizatsiya qilish va boshqa dolzarb masalalar bo‘yicha taqdimotlar bo‘lib o‘tadi.
Izoh (0)