Vyetnamda davom etayotgan futzal bo‘yicha Osiyo chempionati yarim finalida O‘zbekiston milliy terma jamoasi qit’aning eng kuchli terma jamoasi – Eronga 10:0 hisobida imkoniyatni boy berdi. Bu haqda Uff.uz xabar berdi.
8-may, payshanba kuni Vyetnamning Xoshimin shahrida joylashgan Phu To stadionida o‘tkazilgan bahs taqdiri birinchi bo‘limdayoq hal bo‘lib ulgurdi. Alirizo Vafoiy uchrashuvning 1-daqiqasidayoq hisobni ochgan bo‘lsa, Husayn Toyibiy, Asqar Hasanzoda, Ahmad Ismoilpur va Vohid Shofeiy tomonidan kiritilgan gollardan so‘ng Eron terma jamoasi tanaffusga 5:0 hisobidagi ustunlik bilan chiqib ketdi.
O‘zbekistonlik futzalchilar ikkinchi bo‘limda ham kuchli raqibga qarshi jiddiy qarshilik ko‘rsata olmadi. Yakuniy hisob — 10:0 va Eron terma jamoasi musobaqaning finaliga yo‘l oldi. O‘zbekiston esa uchinchi o‘rin uchun bahs olib boradigan bo‘ldi.
Vyetnamdagi musobaqani yakunlab beradigan final va 3-o‘rin bahslari 10-may, shanba kuni o‘tkaziladi. Toshkent vaqti bilan 14:00 da O‘zbekiston milliy terma jamoasi 3-o‘rin uchun Quvayt terma jamoasiga qarshi bahs olib borsa, 17:00 da boshlanadigan o‘yinda yarim finalda Quvaytni 6:1 hisobida mag‘lub etgan Yaponiya Eronga raqib bo‘ladi.
Eslatib o‘tamiz, Bahodir Ahmedov qo‘l ostidagi O‘zbekiston futzal terma jamoasi musobaqa guruh bosqichida Qirg‘iziston bilan durang o‘ynadi (2:2), Yaponiya (2:1) va Janubiy Koreya (3:0) terma jamoalarini mag‘lubiyatga uchratdi. Livan terma jamoasiga qarshi kechgan chorak final o‘yinida esa o‘zbekistonlik futbolchilar 6:2 hisobida zafar quchgan edi.
Izoh (0)