Baxmalda yangi bolalar musiqa va san’at maktabi ochildi

Jizzax viloyati Baxmal tumanida yangi bolalar musiqa va san’at maktabi ochildi. Bu haqda O‘zA xabar bermoqda.

Mazkur ta’lim maskani Prezident Islom Karimovning 2008-yil 8-iyulda qabul qilingan “Bolalar musiqa va san’at maktablarining moddiy-texnik bazasini mustahkamlash va ularning faoliyatini yanada yaxshilash bo‘yicha 2009—2014-yillarga mo‘ljallangan Davlat dasturi to‘g‘risida”gi qarori asosida “O‘rta Osiyo me’mor” keng tarmoqli quruvchilik korxonasi tomonidan bunyod etildi.

Tumandagi ushbu 6-bolalar musiqa va san’at maktabida barcha sharoit yaratilgan, o‘quv-mashg‘ulot xonalari zamonaviy tarzda jihozlangan. 150 o‘ringa mo‘ljallangan maktabda yuzga yaqin o‘quvchi an’anaviy ijrochilik, estrada xonandaligi, o‘zbek xalq cholg‘ulari, zarbli va damli cholg‘ular, xor ijrochiligi, xoreografiya, tasviriy san’at yo‘nalishlarida malakali murabbiylardan saboq olmoqda.

– Shu choqqacha mashg‘ulotlar tumandagi 6-maktabgacha ta’lim muassasasida olib borilar edi, – deydi maktab direktori Muzaffara To‘xtayeva. – Tabiiyki, bu ma’lum noqulaylik va qiyinchiliklar tug‘dirar edi. Endi o‘g‘il-qizlarimiz bu maskanda o‘zlari qiziqqan san’at sirlaridan puxta bilim olish imkoniyatiga ega bo‘ldi.