AQShning ma’lum qilishicha, Shimoliy Koreya yangi yadroviy sinovlarga tayyorgarlik ko‘rayotgan bo‘lishi mumkin. Shu munosabat bilan Vashington Pxenyanni mintaqadagi tinchlikka tahdid soladigan qadamlarni qo‘ymaslikka chaqirdi, deya xabar bermoqda Reuters agentligi ma’lumotiga tayanib “Kun”.
Janubiy Koreyadagi manbalarga ko‘ra, KXDRning Pungeridagi yerosti yadroviy poligonida so‘nggi olti hafta davomida – mart boshidan 19 aprelgacha “yuqori darajadagi faollik” kuzatilgan bo‘lib, bu yadroviy portlovchi qurilma sinoviga tayyorgarlikka ishora bo‘lishi mumkin.
“Koreya yarimorolidagi vaziyatni diqqat bilan kuzatib boryapmiz”, – dedi AQSh davlat departamenti rasmiy vakili Jen Psaki muntazam brifing vaqtida. “Biz hali ham Shimoliy Koreyani mintaqadagi tinchlik va xavfsizlikka tahdid soladigan qadamlarni qo‘ymaslikka, xalqaro majburiyatlarini bajarishga chaqiramiz”, – deya qo‘shimcha qildi Psaki.
Shimoliy Koreya mart oyida, BMT Xafsizlik kengashi Pxenyanni dengizga ballistik raketalarni uchirgani uchun qoralab chiqqanidan so‘ng “yangi ko‘rinishdagi” yadroviy sinovlarni o‘tkazish ehtimolini rad etmasligini ma’lum qilgan edi. Pxenyan aynan nimani nazarda tutayotgani haqidagi savolga Shimoliy Koreya vakili jahon buni “kutishi va tomosha qilishi” kerakligini aytgan.
Mart oyi o‘rtalaridan boshlab KXDR qisqa va o‘rta masofalarga mo‘ljallangan raketalar sinovlarini o‘tkazdi. Pxenyanning bunday sinovlarni o‘tkazishi BMT Xavfsizlik kengashi rezolyutsiyasi bilan taqiqlangan; tashkilot KXDR rahbariyatiga mart oyidagi raketa parvozlarini tushuntirib berish bo‘yicha so‘rov jo‘natgan, biroq Shimoliy Koreya rahbarlari hozircha bu borada izoh berishni istamadi.
Shimoliy Koreya 2005-yili o‘zini yadroviy qurolga ega davlat deb e’lon qilgan. Mamlakatda 2006, 2009 va 2013-yillarda yadroviy qurol sinovlari o‘tkazilgan.
Izoh (0)